Wikipedia

The Falling Man

Custu artìculu est iscritu cun sa grafia Limba Sarda Comuna. Abbàida sas àteras bariedades gràficas:

campidanesu · logudoresu · nugoresu


The Falling Man (S'òmine chi ruet) est una fotografia fata dae Richard Drew in s'ìnteri de is atentados de su 11 de cabudanni 2001 de Noa York. Issa figurat un'òmine chi, intentende de fuire dae is pampas e su fumu causados dae su tzacarru de s'aèreu, si nche ghetat in su bòidu ispentumende dae sa Torre Nord de su World Trade Center. S'òmine est figuradu a conca a bàsciu, cun is bratzos alliniados a is lìnias verticales de s'edifìtziu e una camba prigada.[1][2]

The Falling Man est una de is prus fotografias connotas de s'11 de cabudanni e cunsiderada unu sìmbulu e una de is immàgines prus balentes de su disacatu.[3][4]

Istòria modìfica

A Drew dd'aiant imbiau a fotografare un'isfilada de moda premaman in su Bryant Park de Manhattan.[3] In s'ìnteri de s'atacu, a Drew dd'ant cumandadu de andare a su World Trade Center e, arribbadu in cue, at incumentzau a fàghere fotografias de gente ruende de is iscàrrafachelos.[3] Pagu in antis de rùere is torres, Drew est furriadu a is ufìtzios de sa Associated Press pro chie traballaiat.[3] Sa die a pustis, sa fotografia est istada publicada in is cotidianos de totu su mundu.[3] Su New York Times de su 12 de cabudanni at publicadu s'immàgine e s'ispricadura naraiat:[5]

« Una persone ruet a pustis de si-nch'èssere ghetada dae sa Torre Nord de su World Trade Center. Est istadu un'ispetàculu orrorosu chi s'est repìtidu cando is aèreos ant corfidu is torres. »


S'immàgine est istada criticada meda, ca fiat cunsiderada una farta de discrutzu e un'isfrutamentu de s'immàgine de su disisperadu figuradu in sa foto.[1][3] Pro custas resones, custa e àteras fotografias de òmines ruende sunt istadas tzensuradas e escluidas dae is mèdias. Su New York Times at torradu a faeddare de is brincos in su bòidu in su 2004 e no at publicadu prus The Falling Man finas a su 2007.

In su 2006 est istadu dirìgidu su documentàriu, 9/11: The Falling Man, dedicadu a sa fotografia e a s'istòria sua. S'ispirat a un'artìculu iscritu dae Tom Junod pro s'Esquire in su 2003 e est istadu realizadu impreende puru su materiale fotogràficu de Lyle Owerko chi figurat àteras persones chi ruent de is torres in s'ìnteri de s'atentadu. Sa foto at ispiradu unu personàgiu de su romanzu Extremely Loud and Incredibly Close (2005) de Jonathan Safran Foer e su protagonista de Falling man de Don DeLillo (2007) dedicadu a un'artista chi torrat a creare is eventos de sa fotografia.[3][6]

S'identidade de sa vìtima modìfica

S'identidade de s'òmine in The Falling Man no est mai istada cunfirmada. Pro neghe de su nùmeru artu de persones inserradas in s'edifìtziu no est istadu possìbile identificare su sugetu e s'est carculadu chi is persones chi ant intentadu de si nde fuire dae su fogu ghetende·si·nche dae is edifìtzios sunt de chimbanta a dughentos.[2][3][7][8] Su giornalista Peter Cheney at sugeridu, in su giornale canadesu The Globe and Mail, chi s'òmine figuradu in sa foto poderet èssere Norberto Hernandez, maistu de ofelleria de Windows on the World, su ristorante chi ddoe fiat in su de 106 pranos de sa Torre Nord. Carchi membru de sa famìlia de Hernandez fiat de acòrdiu cun Cheney, ma a pustis de àere esaminadu sa secuèntzia fotogràfica intrea e is minudas de is bestidos suos, non nde sunt istados prus seguros.[9][10] S'est pensadu puru chi sa vìtima poderet èssere Jonathan Briley, tècnicu àudiu e ingennieri se su sonu de barantatrès annos. Briley teniat s'asma e ischiat chi esseret istadu in perìgulu una borta chi su fumu esseret arribbadu a su ristorante.[10] Fintzas Michael Lomonaco, diretore esecutivu de Windows on the World, at decraradu chi s'òmine fiat Briley[11], comente su frade de sa vìtima Timothy.[10] Gwendolyn, sorre de Briley, at naradu:[12] "

« Cando apo castiadu pro sa prima borta s'immàgine [...] e apo bidu chi fiat un'òmine artu, làngiu, apo naradu, 'Si non ddu ischire, diat pòdere èssere Jonathan'. »


Pàginas ligadas modìfica

Riferimentos modìfica

  1. ↑ 1.0 1.1 (EN) John Ingledew, Photography, Laurence King, 2005, pp. 96.
  2. ↑ 2.0 2.1 (EN) Falling Bodies, a 9/11 Image Etched in Pain, in nytimes.com. URL consultadu su 12 ghennàrgiu 2018.
  3. ↑ 3.0 3.1 3.2 3.3 3.4 3.5 3.6 3.7 (IT) Falling Man, in ilpost.it. URL consultadu su 12 ghennàrgiu 2018.
  4. ↑ (IT) “The falling man”, la foto più potente e drammatica che ricorda l’11 settembre, in riviera24.it. URL consultadu su 18 ghennàrgiu 2018.
  5. ↑ (EN) A Day of Terror, in nytimes.com. URL consultadu su 12 ghennàrgiu 2018.
  6. ↑ (IT) L'incubo dell'11/9 e la scelta impossibile dell'uomo che cade, in ilgiornale.it. URL consultadu su 12 ghennàrgiu 2018.
  7. ↑ (IT) 9/11: 'Jumpers' from the World Trade Center still provoke impassioned debate, in telegraph.co.uk. URL consultadu su 18 ghennàrgiu 2018.
  8. ↑ (EN) "Desperation forced a horrific decision, in usatoday30.usatoday.com. URL consultadu su 18 ghennàrgiu 2018.
  9. ↑ (EN) The life and death of Norberto Hernandez, in theglobeandmail.com. URL consultadu su 12 ghennàrgiu 2018.
  10. ↑ 10.0 10.1 10.2 (EN) The Falling Man, in esquire.com. URL consultadu su 12 ghennàrgiu 2018.
  11. ↑ (EN) Jonathan Briley, in edition.cnn.com. URL consultadu su 12 ghennàrgiu 2018.
  12. ↑ (EN) 9/11: The image of The Falling Man that still haunts 10 years on, in mirror.co.uk. URL consultadu su 18 ghennàrgiu 2018.

Ligàmenes esternos modìfica

Bogadu dae "https://sc.wikipedia.org/w/index.php?title=The_Falling_Man&oldid=178608"