Amtrak

Amtrak est su nùmene de sa cumpanzia ferruviària printzipale de sos Istados Aunidos de Amèriga.

Est chistione de sotziedade privada chi tenet sa sea sua in Washington. Amtrak aiat cumintzadu s'atividade sua s'1 de maju de 1971. Sa retza sua est ispainada e efissiente, totalizende 34.000 chilòmetros, mancari siat eletrifigada petzi in parte mìnima. Belle chi su trenu in sos IAA siat semper istadu prus pagu impreadu a petus de sa betura, su postale e s'aparèchiu, e in prus apat semper tentu unu costu elevadu (prus chi totu in cumparadura cun su de su postale), in sos ùrtimos deghe annos su tràfigu de passizeri at rezistradu un'aumentu sensìbile. Amtrak impreat in s'atualidade prus de 20.000 pessones. Onzi die, tzìrculant prus de 300 trenos Amtrak, a belotzidades finas a 240 km. s'ora, aunende prus de 500 destinos in 46 istados e tres provìntzias canadesas.

In s'annu cumertziale de su 2012, Amtrak at trasportadu finas a como unu nùmeru primadu de passizeris, 31,2 milliones, logrende un'intrada de 2.020 milliones de dòllaros IAA. In mesu de s'àteru, Amtrak si notat pro sa sintzillesa e s'efissièntzia de su cuntrollu de sos billetes: cando s'averiguadore cuntrollat su tìtulu de biazu, intregat a su passizeri unu carteddigheddu adesivu a apicare a su seidorzu: in custa manera, sos cuntrolladores chi colant prus a tardu zai ischint chi su billete est istadu averiguadu e non tenent bisonzu de pregontare a su biazadore si su billete zai siat istadu cuntrolladu, comente acontessit in àteros paìsos, Sardinna incrùdida. In Noa Iorcu, sas cumponiduras AMTRAK impreant sa Penn Station, situada zustu intro de bidda.