Furchita
Sa furchita est unu cubertu de mesa cun duas o prus puntas (zenerarmente bator) numenadas corros e arringheradas a pètene, impreadu pro infercher alimentos sòlidos e los batire a sa buca o pro los mantener arressos e los segare a mèdiu de una lepa. Sa furchita est realizada mescamente in metallu, una die in prata, latone e arpaca, oe in atzarzu inossidàbile, peroe b'at finas furchitas de linna. Pro sa restoradura lestra o pro ocasiones in ue non b'est sa possibilidade de samunare sos cubertos, comente picunicos o festas, b'at furchitas de pràstiga a impreu ùnigu, finas insubradas, a s'avesu paris cun lepas e culleras de pràstiga e pannutzos de pabiru, pro resones izènigas.
