Commonwealth de sas Natziones

Artìculu in LSC

Su Commonwealth de sas Natziones (in inglesu: Commonwealth of Nations; literalmente « Comunidade de sas Natziones »), prus comunemente naradu Commonwealth, est una organizatzione interguvernativa creada su 26 de onniasantu 1926, formada de 53 istados membros indipendentes e soberanos. Totus, foras pro su Mozambicu e su Rwanda sunt ex colònias o protetorados de s'Impèriu Britànnicu. Su Camerun est particulare , sende chi sa corona Rènniu Aunidu at retzidu petzi unu mandadu, dadu de sa Sotziedade de is Natziones, a coa de s'ONU, subra una parte minore de su territòriu.

In die de oe galu, su Commonwealth est simbolicamente ghiadu de su soberanu de su Rènniu Aunidu, mancari sa majoria de is paisos membros tengiat istitutziones republicanas. Is natziones chi nde faghent parte sunt acapiadas de interèssios communos, ma sunt indipendentes s'una de s'àtera. Non sunt ligadas de tratadu perunu e podent mantènnere sa neutralidade in su casu chi unu o prus de is àteros membros s'agatent impinnados in cunflitos armados.

Si sa majoria de is colònias britànnicas ant adillidu a su Commonwealth, àteras antigas colònias (is Istados Unidos d'Amèrica) e unos cantos protetorados o paisos suta mandadu nde sunt abarrados a foras, comente Egitu, Irak, Giordània, Palestina, sa colònia e protetoradu de Aden (federatzione de is emirados arabos de su sud), Kweit, Bahrein, Catar is Emirados Arabos Aunidos e s'Oman. Irlanda, Zimbabwe e Gambia, nd'ant fatu parte in passadu.