Otzitània (regione amministrativa)

Artìculu in LSC

S'Otzitània (in frantzesu e ufitzialmente: Occitanie; in otzitanu: Occitània) est una regione de su sud-estu de Frantza, creada dae sa riforma territoriale de 2014 pro mèdiu de sa fusione de sas regiones antigas de Languedoc-Roussillon e de Mesudie-Pireneos. Tirat a 72.724 km² - sa de deghe una parte de su territòriu natzionale- e contat unos 5.626.860 bividores (populatzione munitzipale su 1 de ghennàrgiu de su 2012). S'intrada sua in vigore est istada prevìdida dae sa 1 de ghennàrgiu de su 2016, a pustis de sas eletziones regionales de su nadale de su 2015.

Logo de sa regione

Posidura in Frantza

Bandera

Sa regione est sa de tres prus mannas de Frantza (a pustis de Noa Acuitània e de sa Gujana Frantzesa) e sa segunda de sa Frantza metropolitana. Sa tzitade prus manna e àrea urbana prus pobulada est Toulouse (sa de bator àreas urbanas de s'istadu), gasi comente sa prefetura regionale sua, mentras chi sa segunda capitale de sa regione, Montpellier, mantenet diversas amministratziones. Sa de tres tzitades pro importu est Nîmes.

Sa regione tenet bessida a su mare Mediterràneu in su sud-estu, in s'estu làcanat cun sa regione de Proventza-Alpes-Costa Asula, in su norte cun sa regione de Auvèrnia-Ròdanu-Alpes, in s'ovest cun sa Noa Acuitània e in su sud cumpartzit fronteras cun Andorra e is duas regiones ispagnolas de Aragona e Catalugna.