Donnu Cesare Bisognin: diferèntzias tra is versiones

Fiat nàschidu in Turinu in una famìlia meda devota, e zai a sos 14 annos, a s’agabu de s’iscola obrigatòria, aiat detzìdidu de devenner satzerdotu. In su santugaìne de 1.970, fiat intradu a su Seminàriu Minore, sighende in intro suo sos istùdios mastrales. A bias de s’agabu de sas bagàntzias istiales de 1.974, chi fiat barighende in Celana (Bèrgamu), sa bidda nadia de mama sua, aiat cumintzadu a istare male, serende unu dolore forte in su ghenugru mancu, chi non tzelaiat nostamis de sos cuidados. Unu mese prus a tardu, aiat cumintzadu sos istùdios teolòzigos inche su Seminàriu Mazore, e posteriormente si fiat sutapostu a unos cantos averiguamentos, chi sa corrimposta non li dassaiat isperos: fiat afetu dae un’osteosargoma malinnu in su cossale mancu. In su 1.975 si fiat sutapostu a diferentes terapias, finas meda imbasivas e dolorosas. In su matessi tempus, fiat istadu pellegrinu in Roma e in Lourdes pro s’Annu Santu, bardende su cuntatu cun su Seminàriu. S’archipìscamu de Turinu, Michele Pellegrino su cardinale, aiat cumpresu chi Cesare deviat esser ordinadu satzerdotu e aiat logradu sa dispensadura ispetziale dae Paulu Vi su paba pro s’edade sua zòvana. Fiat istadu Pellegrinu etotu su chi l’aiat acordadu s’òrdine in domo sua sa domìniga 4 de abrile de 1.976: in sas duas dies anterioras, Cesare aiat logradu sos ministèrios e sa diaconia. In sas dies sighidoras, cun s’azudu de donnu Pino s’amigu suo, aiat ufissiadu deghessete missas, chi dòighi in domo e chimbe in s’ispidale, a ue l’aiant internadu torra pro neghe de s’agravamentu de sas cundissiones suas. Su 26 de abrile Donnudonnu Cesare, cumprendende chi s’acurtziaiat s’agabu, aiat pedidu de esser batidu de nou a domo sua, in ue fiat mortu duas dies a pustis, a sos 19 annos. A su funerale suo aiant leadu parte prus de chimbighentas pessones, mescamente zòvanos. Donnu Cesare discansat in su campusantu monumentale de Turinu.