Articulu in nugoresu

Sa lìmba de Okinawa est una limba chistionàda in Giappone, a zosso in s'ìsula de Okinawa, in cussas chi li sun a Oriente e fìntzas in atteras comente Kerama, Kume-jima, Tonaki e Aguni. Sa limba de Okinawa fachet parte de su grùstiu de sas limbas ryukyu; si ischìrriat in battor limbazos: shuri, naha, torishima e kudaka. Su dialètu shuri, sicomènte nde fachìat impreu s'aristocratzìa de su locu, fit postu a norma de istandard in sutta de su rennu Ryūkyū de tàndo, cando fit re Sho Shin dàe su 1477 a su 1526; paritzos cantos e poesìas sun iscrittas in shuri.

Màpa de sa limba de Okinawa, in sa variedàde de sùsu (in biaìttu) e de zòsso (in ruju).

In Giappone, sa limba de Okinawa non si la cussìderat, pro resònes polìticas, una limba a bànda dae su giapponèsu ma, prusaprèstu, unu dialètu (沖縄方言 Okinawa hōgen) o galu, refudàndeli carattere de unidade, duos limbazos chi si chistionaban in s'isula, cussu tzentràle e cussu meridionale (沖縄中南部諸方言 Okinawa Chūnanbu Sho hōgen). Su Giappone, pro mèdiu de cosas comente sa tessera de su dialettu, at semper pessichiu una politica assimilatzionista contr'a sas atteras curturas chi bi aìat in sìnu suo: pro custu, sa limba de Okinawa la faveddan abberu in pacos oje in die, tentu galu in bida e in ammentu chin operas de teatru comente sos uchinaa shibai.