Studio Ghibli

Articulu in logudoresu

Studio Ghibli, Inc. (株式会社スタジオジブリ Kabushiki-gaisha Sutajio Jiburi) est un'istudiu de anime giapponesu fundàdu in Koganei (Tokyo). S'Istudiu est fentomadu pro sos traballos suos, chi sun pro su prus anime, ma at fattu fintzas film in curtzu, prubitzidades cummertziales e unu film pro sa telebisura. Lu aìan fundàdu in su mese de làmpadas de su 1985 a pustis de su sutzessu mannu de Nausicaä de sa Badde de su Bentu (1984), chin finantziamentos dae Tokuma Shoten.

Oto de sos anime de Studio Ghibli sun tra sos 15 film anime fattos in Giappone chi apan prus bèndiu, chin Sa Tzittade Incantada (2001) sende su primu in classifica, balanzande peri tottu su mundu prus de 274 miliones de dollaros. Medas traballos suos an bintu fintzas su premiu Animage Anime Grand Prix e battor an bintu su Premiu de s'Accademia Giapponesa pro s'Animassione de s'Annu. In su 2002, Sa Tzittade Incantada at bintu un'Urtu Indoradu e unu Oscar pro su Menzus film de Animassione in su 2003.

In su 3 de Agustu de su 2014, a pustis chi su direttore Hayao Miyazaki si nche fit andadu in pensione, Studio Ghibli at nàdu chi cherìat firmare sa produida de film.