Tuone Udaina
Articulu in nugoresu
Tuone Udaina (mortu in su 10 de Làmpadas de su 1898), connottu finas comente Antonio Udina in italianu, est istada s'urtima pessona a tènner cumpetentzia attiva de su dalmaticu. Issu fit sa fonte printzipale de informatziones in supra de su limbazu de sos mannos suos, cussu de s'isula de Veglia (Krk in croatu), pro su limbista Matteo Bartoli, chi lu aìat intervistau in su 1897, mancari chi non seret propriu s' "ideale": non fit dalmaticu de limba mama e sa limba l'aìat imparada dae sos negossios chi sos mannos suos fachìan in dommo (comente aìat nau: E-l mi tuota e la maja niena favlua cosaic, in veclisun, jali favlua ce jali kredua ce ju non kapaja, ma ju toč! bortau "Babbu meu e mama mea goi faveddaban, faveddaban in viklasun, pessande chi deo non los cumprendìo, ma aìo cumpresu tottu!"), in prus non la chistionabat prus dae oramai 20 annos e fit surdu e chene dentes: difattis, no an mai fattu registratziones sonoras in supra de sa limba chi faveddabat. Tuone Udaina traballabat che barbèri, e pro custu li naban finas burbur. A sas ses de bortaedìe de su 10 de làmpadas in su 1898, una mina de terra lu aìat mortu e, chin issu, finas su dalmaticu ch'est iscumpartu pro semper.
