Leonarda Cianciulli

Custu artìculu est iscritu cun sa grafia Limba Sarda Comuna. Abbàida sas àteras bariedades gràficas:

campidanesu · logudoresu · nugoresu

Leonarda Vincenza Giuseppa Cianciulli (Montella, 18 de abrile de su 1894 - Pozzuoli, 15 de santugaine de su 1970​), est istada un'assassina in filera italiana, connota comente "Sa sabonera de Correggio" (in limba italiana: "La Saponificatrice di Correggio"), pro su fatu de ochìere a tres fèminas intre sos annos 1939 e 1940, faghende de is corpos issoro sabone e pistoncos.

Leonarda Vincenza Giuseppa Cianciulli
Retratu sinnalèticu de Leonarda Cianciulli
Àteros nùmenes	Nardina, Norina, Pansardi (sambenadu de su maridu)
Paranùmenes	La Saponificatrice di Correggio (Sa Sabonera de Correggio)
Naschimentu	Montella, 18 de abrile de su 1894
Morte	Pozzuoli, 15 de santuaine 1970 a sighidu de una emorragia tzerebrale
Vìtimas averigurdas	3
Vìtimas suspetadas	-
Perìodu de is bochiduras	1939 - 1940
Logos	Correggio, provìntzia de Reggio Emìlia, Regnu de Itàlia
Mètodos de ochidura	Afracada cun destrale
Àteros crìmenes	Cuamentu de carasa, minusprètziu de carasa, cannibalismu
Arrestu	3 de martzu de su 1941
Cundenna	30 annos de presonia, cundanna a primìtziu a sa presone a vida e 3 annos de manicòmiu criminale, cunvèrtidos in detentzione a vida in manicòmiu
Tempus de presonia	1941- 1970

In antis de is assassìnios

Cianciulli fiat nàschida in Montella, e galu pitzochedda aiat intentadu si ochìere duas bortas. In su 1917 si fiat cojuada cun s'impreadu Raffaele Pansardi, e su babbu e mama suos non fiant assortidos a sa coja, ca cheriant chi si cojuaret cun un'àteru òmine, resone pro chi issa naraiat chi in custa ocasione sa mama ddi aiat ghetadu ogru. Sa pariga si fiat tramudada a sa tzitade de Pansardi, Lauria, in su 1921. Leonarda fiat istada impresonada pro fràudu in su 1927. Cando fiat essida dae sa presone si fiat tramudada cun su maridu a Lacedonia, ma sa domo issoro fiat andada distruida in unu terremutu in su 1930. Si fiant tando tramudados torra a Correggio in ue Cianciulli aiat abertu una buteghedda, chi si fiat fata populare e abbitada dae is bighinos suos.

Leonarda aiat tentu 17 ingraidàntzias, ma aiat pèrdidu tres de issos pro neghe de istrumaduras ispontàneas,mentras àteros deghe fiant mortos in su bratzolu. Pro custa resone si fiat fata mama amparadora cun is àteros 4 chi fiant subrabìvidos. Is timorias suas fiant sustentadas dae una fatiàrgia chi tempus in antis ddi aiat naradu chi si diat cojuare e diat tènnere fìgios, ma chi totu is fìgios diant mòrrere. Is bator fìgios chi fiant subrabìvidos, fiant arribbados annotamala a pustis chi Cianciulli aiat pedidu s'agiudu de una majàrgia de su logu.

Bochiduras

In su 1939, Leonarda aiat ischidu chi su fìgiu mannu, Giuseppe, si fiat arruoladu in s'esèrtzitu italianu pro si preparare a sa Segunda Gherra Mundiale. Giuseppe fiat su fìgiu preferidu suo e fiat determinada a dd'amparare a totu is costos. Fiat arribada a sa concruida chi sa seguresa sua rechediat sacrifìtzios umanos. Is vìtimas fiant istadas tres clientes suas de edade mèdia, e totu bighinas. Cianciulli oferiat intre àteros servìtzios de chiromantzia astrologia e is vìtimas suas fiant istadas de issa chirchende agiudu.

Faustina Setti

Sa prima de is vìtimas, Faustina Setti, fiat una bagadia chi fiat assortida a Leonarda pro si fàghere agiudare a agatare maridu. Cianciulli ddi aiat faeddadu de unu candidadu possìbile in Pula, Ìstria, ma ddi aiat naradu de non allegare cun nemos subra custa nova. Puru dd'aiat cumbinta a iscriere lìteras pro sos amigos e familiares suos, e chi issa [Cianciulli] ddas diat mandare cando arribaret a Pula pro chi ischirent chi istaiat bene.

Sa die chi Setti depiat partire a Pula, fiat torrada a agatare a Cianciulli e custa ddi aiat cumbidadu una tassa de binu cun sonnìferos. Mentras chi dormiat, dd'aiat ochida cun unu destrale e aiat cuadu su carasu in un'armàriu. Aiat segadu su carasu a cantos e aiat regortu su sàmbene in una dischedda. Cun su corpus aiat fatu sabone e cun su sàmbene aiat fatu pistoncos chi aiat cumbidadu a is fèminas chi andaiant a dda bisitare e chi tantis issa comente su fìgiu Giuseppe aiant papadu.

Francesca Soavi

Francesca Soavi fiat istada sa segunda vìtima. In custu casu, Cianciulli, ddi aiat naradu chi ddi aiat agatadu unu postu de traballu comente maistra in un'iscola pro pipias in Piacenza. Ddi aiat fintzas naradu de iscrìere lìteras pro is chi connoschiat, dende·ddi totu is minudas de su pranu suo. Soavi puru fiat andada a dd'agatare sa die de si nche andare (su 5 de cabudanni de su 1940). Issa aiat tentu una sorte diferente, sende chi fiat istada iscuartarada bia.

Virginia Cacioppo

Sa vìtima ùrtima de Cianciulli fiat istada Virginia Cacioppo. A issa Cianciulli aiat contadu chi ddi aiat agatadu traballu comente segretària pro un'impresàriu misteriosu in Firenze. A Cacioppo puru aiat racumandadu de non faeddare a nemos subra su traballu. Cussu mangianu (su 30 de cabudanni de su 1940) in antis de partire fiat andada a agatare a Cianciulli e paris che a Setti ddi aiat fatu proare su matessi binu cun sonnìferu e dd'aiat ochida.

Iscoberimentu e protzessu

Sa connada de Cacioppo aiat comintzadu a si fàghere suspetosa pro s'isparessimentu de Virginia, ca s'ùrtima borta chi dd'aiat bida fiat intrende in domo de Cianciulli. Aiat contadu is suspetos suos a su subrintendente de sa politzia de Reggio Emilia, chi aiat abertu una chirca e fiat imbàtidu a s'arrestu de Leonarda pagu tempus a pustis. Cianciulli no aiat cunfessadu is crìmines fintzas a cando su fìgiu Giuseppe aiat comintzadu a èssere suspetadu. Aiat tando cunfessadu is crìmines dende totu is minudas possìbiles pro dimustrare s'innotzèntzia de fìgiu.

Fiat istada decrarada culpàbile de is crìmines e fiat istada cundennada a 30 annos de presone e 3 annos in un'istitutu pro criminales. Cianciulli diat mòrrere in un'istitutu criminale pro fèminas in Pozzuli su 15 de santugaine de su 1970. Diversas proas de su casu, intre issas su caldarone in ue coghiat a is vìtimas, sunt ammustradas in su museu de su crìmine de Roma.