Bolabentu

Traste pro sa medida de su bentu

Sa bolabentu est una casta particulare de anemoscòpiu, est a narrer unu medidore rudimentàriu de su bentu. Est custituìda dae unu truncu de conu de pannamenta resistidora a su frussu de s'àera e a s'intempèriu fissadu, a s'ala de s'inghitzadura prus manna, a s'istremidade furriadora de un'anta de arrimu. Su bentu, sulende a intro de sa bolabentu, nde mudat sa posissione dispensende inditamentos in contu de sa deretura e s'intensividade sua. Est installada in sos logos in ue est importante a tenner s'inditamentu immediatu bisuale de sa fortza e de sa deretura de su bentu, pro isempru subracoladorzos, installaduras chìmigas e, in manera particulare, abioportos.

Bolabentu

Funtzionamentu modìfica

Su funtzionamentu est intuitivu: su bentu, intrende a su conu de pannamenta, l'unfrat prus o mancu cunforme a s'intensividade sua e nd'aderetat s'istremidade prus astrinta (sa prus a tesu dae s'anta) in sa deretura contrària a cussa de aproghilamentu. Duncas, est possìbile a abaliare bisuarmente cun immediatura, mancari cun aprossimadura:

  • s'intensividade de su bentu dae su gradu de unframentu de su conu e dae s'incrinadura sua cunseghidora a petus de su pranu orizontale;
  • sa deretura de aproghilamentu de su bentu dae sa posissione de sa bolabentu a petus de su nordu. Est craru chi, cando b'at assèliu de bentu, sa bolabentu abarrat allidreddada dessintotu a longu de s'anta.

Sas fascas coloradas arternadas aumentant sa bisivilidade de sa bolabentu.

Caraterìstigas modìfica

Sas recumandaduras e sos istandards de s'abiadura internassionales dispensant inditamentos pretzisos a propòsitu de sa forma e su colore de sas bolabentu:

  • pannamenta colorada in manera a resartare a petus de su fundu inghiriadore, pro poder esser bisìvile dae 300 m. de artària a su nessi;
  • longària mìnima 3,6 m., diàmetru mìnimu de s'inghitzadura prus manna 0,9 m.; 3) pro sas bolabentu unicolores, est autorizadu s'impreu de s'arbu e de s'arantzu;
  • in sos logos in ue sas caraterìstigas de su fundu inghiriadore rennant preferìbile s'impreu de colores arternados, custos podent esser arantzu e arbu, o puru ruju e arbu, o tando arbu e nieddu. Sas coloraduras devent esser arringheradas in chimbe fascas arternadas cun su colore prus iscuru a s'istremidade;
  • in sos abioportos destinados a atividades abionàutigas notencas, a su nessi una de sas bolabentu disponìbiles devet esser allugada;
  • a su nessi una de sas bolabentu disponìbiles in un'abioportu devet esser evidentziada dae unu tzìrculu de 15 m. de diàmetru e 1,2 m. de ladària, cun su tzentru cuintzididore cun s'anta de sa bolabentu de colore preferentemente arbu o, in onzi modu, bisìvile cun fazilidade.

Posissionamentu modìfica

Su posissionamentu curretu de sa bolabentu est un'elementu importante pro su chi pertocat s'impreu. In onzi abioportu, est netzessàriu a installare a su nessi una bolabentu, chi devet esser posissionada in manera a esser bisìvile craramente dae sos usuàrios, o siat sos abiomòbiles in bolu, in s'arzola de manobra, in sos partiles e a largu dae ozetos chi podant causare istrobu a su funtzionamentu curretu.

Su respetu de custos printzìpios intuitivos est indispensàbile pro su funtzionamentu bonu de totu sas bolabentu, incrùdidas cussas ubigadas in cuntestos no abionàutigos.