Captains Courageous

Articulu in logudoresu

Captains Courageous (in sardu:Cabitanos balentes]] est unu romanzu ingresu de su 1897 iscritu dae Rudyard Kipling, chi narat sas abenturas de Harvey Cheyne Jr. su bindigarzu, fizu imberriadu de unu cabotatzu de sos caminos de ferru, a pustis chi est sarvadu dae una barca de pisca in s'Atràntigu de su nordu. Su romanzu fiat istadu pubrigadu pro sa prima bia in pasias in sa rebista britànniga “McClure's”, cumintzende cun s'edissione de santandria de 1.896.

Sa cobertina de sa publicidade de su cominzu de sa serie de su romanzu, 1896

Su tìtulu de su libru benit dae sa ballada “Mary Ambree”, chi printzìpiat gasi: “Sos cabitanos balentes, chi sa morte no atemorit”. Kipling aiat impreadu anteriormente su matessi tìtulu pro un'artìgulu subra de sos òmines de afares comente abentureris noos, pubrigadu in “The Times” su 23 de santandria de 1892.

Su romanzu no est istadu bortadu mai in sardu.

Inredu

Harvey Cheyne est su fizu imberriadu de unu cabotatzu de sos caminos de ferru e de muzere sua, ch'istant in Santu Diegu, California. A pustis de ruer a modde dae una nae transatràntiga a papore e de esser sarvadu dae piscadores a largu dae su Newfoundland, Harvey Cheyne su zòvanu non resessit a los cumbincher a lu batire torra lestramente a unu portu e nemancu de su fatu de esser ricu. Disko Troop, cabitanu de sa “We're here” (“Semus inoghe”), li cùmbidat unu traballu de membru de echipazu finamentras a cando torrent a portu. No tenende issèberu, Harvey atzetat.

Peri una sèrie de proas difìziles e abenturas, su piseddu imparat a s'adatare a sa bida sua noa e, cun s'azudu de s'amigu suo, Dan Troop su fizu de su cabitanu, resessit a progressare. A s'agabu, sa guleta torrat a portu e Harvey imbiat unu telegramma a babos suos. Issos s'impressant a si zugher a Boston, postu a s'àtera ala de su paìsu, in su bagone ferruviàriu issoro privadu, a su cale l'est acordada prioridade a subra de su tràfigu cumertziale. Dae ie, issos andant a sa bidda de piscadores de Gloucester e constatant chi fizu issoro est maturadu e s'est fatu unu zòvanu dilizente, sèriu e echilibradu.

Sa mama de Harvey recumpensat su marineri chi aiat sarvadu fizu suo dae s'afogamentu. Su babu de Harvey recumpensat su Cabitanu Troop leende in servìtziu fizu suo Dan pro chi traballet in sa frota sua prestizosa de beleris lestros chi trasportant te. Isse est meda ditzosu de sa maturidade de fizu suo, s'acapiadura intre issos mezorat e Harvey detzidit de cumintzare sa carrera sua in sas lìnias de navegadura de su babu.