Fabrizio Lorieri

Fabrizio Lorieri (Massa, 11 de freargiu 1964) est un'assussadore de fùbalu e fubaleri antigu italianu, a posissione zanneri.

Carrera

Zogadore

Crèschidu in s'Inter, s'istrenat in s'istajone 1981-1982 cun sa Sangiovannese (Sèrie C2), pro colare in copropriedade a su Pradu s'annu posteriore: cun sos tuscanos, binchit su campionadu de sa Sèrie C2 de 1982-1983. In su 1983, torrat a s'Inter comente sustitutu de Walter Zenga, peroe a pustis de un'istajone sena intrare a su terrinu est tramudadu, aguarmente in copropiedade, a su Praghèntzia, in sa Sèrie C1: cun sos emilianos, dìsputat un'istajone a titulare, perdende sa Sèrie B in fatu de su disimpate cun su Lanerossi Bissèntzia.

A pustis de un'àtera istajone sena presèntzias in s'Inter, lu tzedent a su Turinu. Cun s'echipa peemontesa zogat tres campionados de Sèrie A dae su 1986 a su 1989, disputende-nde a titulare firmu petzi unu (1987-1988) e sufrende, in sas istajones abarradoras, sa cuncurrèntzia de zanneris sustitutos che Renato Copparoni e Luca Marchegiani. In s'istajone 1988-1989, sa relassione cun su Turinu intrat definitivamente a crisis e, a pustis de su sutagradamentu de sos granadas, si tràmudat a s'Àsgoli, in ue abarrat pro bator istajones (duas in sa Sèrie A e duas in sa Sèrie B).

In su 1993, arribat a sa Roma pro 4.000 milliones de francos betzos; cun sos grogurujos, totalizat 20 presèntzias in sa prima istajone e 2 in sa segunda in sa Sèrie A (istrenu su 29 de austu de 1993 in Genoa-Roma 2-0).

In su 1995, est tzèdidu a su Letze, in sa Sèrie C1, in ue lograt duas artiadas cunsecutivas de partzidura (dae sa C1 a sa B e dae sa B a s'A). In s'istajone 1997-1998, est titulare in sa Sèrie A cun su Letze, chi falat de partzidura.

In s'istajone 1998-1999, in sa Sèrie B, otenet torra su subragradamentu a sa partzidura prus arta cun sos salentesos. In su tempus barigadu cun su Letze, zogat pro duos annos cun Giuseppe Giannini s'ex cumpanzu in sa Roma. In su santandria de 1999, no intrende a sos pranos de sa sotzietade, est cuntratadu dae sa Salernesa (Sèrie B), in ue mìlitat pro un'istajone in antis de colare a su Genoa a tràmunu de Salvatore Soviero (àteros duos annos in sa Sèrie B). In su làmpadas de 2003, est in s'Ispètzia, in sa Sèrie C1, in ue nche ferit belle deretu a foras de prantedda e, in su ghennarzu de 2004, colat a su Cuoiopelli Cappiano Romaiano, in sa Sèrie C2, in ue tancat sa carrera sua.

Amaniadore de sos zanneris e bitze-assussadore

A pustis de sa retirada, si ligat a Luigi Cagni, un'assussadore chi sighit in sas isperièntzias in su Catanzaru comente amaniadore de sos zanneris, a s'Èmpoli in s'istajone 2006-2007 e posca in sa parte finale de s'istajone 2007-2008 e a su Parma finas a su santandria de 2008, cun ambas echipas aguarmente in su rolu de bitze. Su 30 de làmpadas de 2010, su Letze, in tempus de una cunferèntzia de imprenta pro su mudamentu de sa presidèntzia, ufissializat su cuntratamentu suo pro s'istajone 2010-2011, comente amaniadore de sos zanneris. Pustis lograda s'abarrada in partzidura e sa cunsagradura de Antonio Rosati su zanneri, chi posteriormente colat a su Nàpule, est recunduìdu finas pro s'istajone posteriora, cando realizat un'àteru traballu mannu cun Massimiliano Benassi. Arreat in su Letze finas a su ghennarzu de 2013, cando est sustituìdu dae Raffaele Di Fusco, chi format parte de su pessonale de Antonio Toma s'assussadore, intradu in parte a Franco Lerda.

In s'istiu de 2013, est leadu in servìtziu dae su Sassuolo, in pessu artiadu a sa Sèrie A, comente assussadore de sos zanneris.