Faeddòfonu

Su faeddòfonu o interfonu (evitare s’italianismu tzitòfonu) est unu sistema eletrònigu intercomunicadore installadu in sos fraigos cun s’intentu de permiter sa comunicadura intre un’istassione situada a probe de s’intrada e sos bividorzos privados, e aberrer sas zannas dae largu.

Funtzionamentu

Su printzìpiu de funtzionamentu de su faeddòfonu est assimizadore dessintotu a su de su telèfonu, francu pro su fatu chi no esistit unu sistema de marcadura. In s’unidade isterna s’agatat unu micròfonu chi trasduet sas undas sonoras de sa boghe de chie faeddat a una bariadura de tensu currespondidora (fortza eletromotora).

Su tensu sizit un’artufaeddadore in s’unidade interna, in ue sa bariadura de tensu est recunvertida a sonu. Unu tzircuitu idèntigu permitet sa comunicadura a s’imbesse.

Un’installadura faeddofòniga est custituida dae chimbe partziduras:

Butonera: agrupat sos butones chi permitent de mutire un’apartamentu; unu tzircuitu cunetat onzi butone a una soneria presente in s’unidade interna currespondidora. A s’avesu, incruet finas unu sistema de allugadura notenca.

Unidade audiofòniga isterna: installada a probe de s’intrada, incruet un’artufaeddadore, unu micròfonu e fitianu un’amprifigadore.

Unidade audiofòniga interna: bi nd’at una in onzi apartamentu e cumprendet unu retzidore cun micròfonu e artufaeddadore, una soneria, unu butone pro cuntrollare s’abertura de sa zanna e, in unos cantos casos, àteros pursadores pro mandare àteras funtziones.

Alimentadore: aprovisionat sos tensos elètrigos netzessàrios pro su funtzionamentu de su sistema.

Abrizanna: est unu sistema de cuntrollu (avesarmente unu relè) chi, cando est incarcadu su butone postu in s’unidade interna, mandat s’abertura de su serrarzu elètrigu.