Furriada in tundu

Sa furriada in tundu est una rodadura ràpida de un'automòbile a inghìriu de s'asse bertigale, chi acontessit in determinadas tzircustàntzias cando su ghiadore nde perdet su cuntrollu.

Definitzione

Si faeddat de furriada in tundu cando sa betura realizat una rodadura de 180 grados a su nessi in antis de s'arressare. Belle gasi, sa rodadura podet esser finas de 360 grados o foras male de prus furriadas, mesche si sa belotzidade de sa betura est meda arta.

Causas

Sa furriada in tundu podet acontesser in tzircustàntzias bariadas:

- in sa borta, cando sas rodas de palas perdent aderèntzia (pro neghe de sa belotzidade etzessiva, o tando de iscarafossos, macras de ozu, crastos o àtera cosa), si su pilota non reassionat immediatamente contrabirende su cuzone de derapada (est a narrer su cuzone intre sa deretura de martza e cussa a ue est aderetadu su beìculu) aumentat semper de prus e s'automòbile si fùrriat in tundu e nch'essit dae sa caminera a foras de sa borta. In cundissiones determinadas (belotzidade particularmente elevada, baritzentru artu, tzocu contra a imbaros bassos, ruta a unu palone, eac.), sa betura si podet finas bortulare;

- in tempus de una frenada meda forte, su pesu de sa betura s'arrimat preferentemente in sas rodas de palas: sa frenada perdet duncas de eficàssia in sas de palas, e prus chi totu si sa frenada est realizada in sa borta o cun sa betura no perfetamente dereta, sa parte de palas de s'automòbile podet lassinare a foras chirrarmente provochende sa furriada in tundu o, che in su casu anteriore, a bias finas su bortulamentu;

- in s'essida dae una borta, cun una betura a trassione de palas, si su pilotu abrit s'illestridore demasiadu cadriamente, s'automòbile intrat a unu subrabiradore meda forte e si su pilotu non lu cuntrollat, derapat e fùrriat in tundu, essende fitianu dae sa caminera chirru a s'internu de sa borta;

- provocadu in manera boluntaria assionende su frenu a manu in sa borta. Su frenu naradu difatis, assionat a subra de sas rodas de palas ebia: frenende in sa borta, issas si brocant e làssinant immediatamente. Custa manobra si podet isecutare, pro narrer, pro imberter sa deretura cun lestresa o in tretos limitados; belle gasi, dimandat meda capatzidade e esperièntzia pro esser realizada in modu curretu, in casu contràriu cheret evitada sende chi si podent provocare intzidentes.