Istassione ferruviària de Casteddu Su Masu

S'istassione ferruviària de Casteddu Su Masu format parte de su grupu Caminos de Ferru Nassionales e s'agatat in sa lìnia Casteddu-Figari, servende sa leada de Su Masu

Istòria

S'istòria de su transitadorzu dat cumintzu in sa segunda metade de su milliotughentos, addaghi sa Cumpanzia Reale de sos Caminos de Ferru Sardos aiat printzipiadu sa realizadura de sa retza ferruviària pùbriga de ladària minimada de sa Sardinna. Su prozetu prebidiat sa colada de sa lìnia chi diat aer aunidu Casteddu cun su Cabu de Susu finas in sa parte suddu de sa comuna de Su Masu, a pagas chentinas de metros dae s'Istanzu de Santa Gilla. S'1 de maju de 1.871, data de inaguradura de su primu rugru de sa lìnia Casteddu-Figari, cumpresu intre sa cabitale rezionale e Biddesorri, aiat cuintzìdidu cun s'abertura de s'istassione de Su Masu de sos tempos.

A pustis de s'aunire cun sa retza de sos Caminos de Ferru Reales a sos CFN in su 1.920, s'istassione de Su Masu aiat mudadu su nùmene suo pagu tempus a pustis de s'annessura de sa comuna de Su Masu a sa de Casteddu in su 1.937. Dae tando, s'istalladura zughet su nùmene ufissiale de Casteddu Su Masu, mancari Su Masu siat torradu a esser comuna autònoma in su 1.989.

In sos annos setanta de su sègulu coladu, aiant dadu cumintzu sos traballos pro su duprigamentu de su rugru Casteddu-Deximumannu de sa Dossale Sarda, chi aiant pertocadu finas s'istassione de Casteddu Su Masu, chi fiat istada reinnoada profundamente: s'installadura fiat istada probida de unu fraigu de biazadores nou e prus mannu (su betzu fiat istadu demolidu), fiant istados realizados sutacoladorzos pionales pro nche sizire sos apeadorzos e fiat istadu fraigadu unu terminale de mercantzias intermodale (in operatividade dae su 1.986, su primu de custa zenia in Sardinna cun filera de bias currespondedora). In prus de custu, in sa segunda metade de sos annos otanta s'istassione fiat istada pertocada dae sos testes relassionados cun su prozetu, posteriormente abandonadu, de eletrifigadura cun currente arternada de sa lìnia Casteddu-Figari. Pro sos testes narados, aiant installadu sas lìnias abiàtigas pro s'alimentadura de sas locumotivas E491/492 in sos rugros Casteddu-Deximumannu (ch'incruet finas s'istassione de Casteddu Su Masu) e Biddesorri-Seddori Istadu. Sas cadenàrias fiant istadas remoidas dae su transitadorzu annos a pustis de s'abandonamentu de su prozetu.

Caraterìstigas

Realizada a longu de sa Dossale Sarda, s'istassione de Casteddu Su Masu, dae su puntu de bista infraistruturale, est probida de 4 bias echipadas pro su servìtziu de passizeris. Su primu est serente a su fraigu de biazadores, cando chi sos àteros tres sunt sèrvidos dae duos apeadorzos (unu a cumone intre sas bias 2 e 3 e unu pro sa bia 4) sizìbiles a mèdiu de unu sutacoladorzu. Addae de custos, s'istassione est dotada finas de unu terminale intermodale de mercantzias, cun filera de bias currespondedora apositiva, situada a costazos de su fraigu de biazadores. Custu ùrtimu est custituìdu dae unu fraigu de duas prantas cun unu terasseddu, a pranimetria retangulare.

Moimentu

In relassione a s'oràriu de su segundu semestre de 2.012, s'istassione est sèrvida dae sas cumponiduras de Trenitalia, in particulare dae sos trenos metropolitanos de su servìtziu ferruviàriu metropolitanu de Casteddu e dae sos trenos rezionales chi tenent comente conca de lìnia, in prus de s'istassione de Casteddu, sos transitadorzos de Carvònia, Serbariu, Iscrèsias, Santu Bèngiu, Aristanis e Macumere.

				Casteddu Su Masu
Deretura		Istassione anteriore		Caminu de ferru		Istassione posteriora		Deretura
Casteddu		Su Masu Abiuportu		Casteddu-Figari  (8+301)		Assèmini Càrmine		Figari