La aventura de Miguel Littín clandestino en Chile

Custu artìculu est iscritu in sa grafia campidanesa. Abbàida sas àteras bariedades gràficas:

logudoresu · LSC · nugoresu

La aventura de Miguel Littín clandestino en Chile (1986) est unu lìburu de Gabriel García Márquez.

Est un'arrelata de sa bìsita clandestina de su regista cilenu Miguel Littín in su 1985 a su paisu suu de nàscida apustis de 12 annus in esìliu.

Trama

Apustis de dexi annus de ditadura, Augusto Pinochet at publicau una lista cun is nòminis de is disterraus chi ddis permitiat de furriai a su Cile. Miguel Littín no fiat in sa lista, ma in un'àtera cun is personas chi no podiant fai bìsita a su paisu. Custu fatu at cumbintu a Miguel chi s'ùnica manera de furriai a sa pàtria sua fiat cun passaportu, traballu, motivu e fintzas pobidda farsus.

In s'interis de sa bìsita, Littín, faendi-si passai po òmini de afaris uruguajanu, dirigit tres scuadras cinematogràficas po realizai unu documentàriu apitzus de sa vida in Cile asuta de sa ditadura. Filmat intervistas cun cilenus comunus e cun genti de movimentus de sa resistèntzia chi òperant in forma clandestina. Otenit un'intervista cun una de is ghias de s'insurretzioni, candu nci-ddu portant cun is ogus bendaus a unu spidali clandestinu innui s'agatat sa ghia a pustis chi una scuadra soversiva dd'at pigau de unu spidali pùblicu, innui fiat sanendi de is fertas causadas de s'intentu de ddu bociri organizau de sa politzia segreta di Pinochet.

Miguel arrennescit in sa missioni sua e lassat su Cile in unu momentu innui is autoridadis iant scobertu sa presèntzia sua e is imbistigadoris ddu serbànt in s'arioportu. Sa realizatzioni de su documentàriu teniat sa punna de amostai a su mundu su scontròriu brutali e sbregungiri su regìmini de Pinochet faendi biri is arretzas de giòvunus traballendi po sciusciai sa ditadura.

Sperdìssiu de is còpias

Su lìburu est stètiu publicau in su 1986. In friaxu de su 1987, su ministèriu de s'internu at decrarau de ai abruxau 15.000 còpias de sa prima editzioni de La aventura de Miguel Littín clandestino en Chile su 28 de sonniasantu de su 1986 in Valparaíso po cumandu de Augusto Pinochet.