Màriu Frantziscu Pompedda

Màriu Frantziscu Pompedda (Otieri, 18 de abrile 1929 - Roma, 18 de santugaine 2006), est istadu unu cardinale e archipìscamu catòligu sardu.

Biografia

At realizadu sos istùdios zinnasiales in su Seminàriu archipiscamale de Tàtari e sos istùdios litzeales filosòfigos in su Seminàriu rezionale de Cùlleri.

In Roma, de dischente de s’Armu Cullezu Capranica, at logradu inche s’Universidade Pontifale Gregoriana s’indutoramentu in matèrias teolòzigas e, inche s’Istitutu Pontifale Bìbrigu, sa lissèntzia in Iscritura Sagra. Posteriormente, at otentu s’indutoramentu “in utroque iure” inche s’Universidade Pontifale Lateranesa, gasi comente su tìtulu de Abogadu Rotale inche su “Studium Sacrae Romanae Rotae”.

At retzidu s’òrdine sagru su 23 de nadale de 1955. In prus de su ministèriu de bigàriu in sa bigaria de Nossa Sennora de Guadalupe in Monte Mario in Roma, est istadu Cussizeri Ecresiàstigu de s’Unione Romana de Zuristas Catòligos e at isvilupadu diferentes incàrrigos moende cun su 1955 inche su Tribunale de sa Rota Romana.

Numenalizadu archipìscamu titulare de Bisarcio su 29 de santandria de 1997, at retzidu s’ordinamentu episcopale su 6 de ghennarzu de 1998 in sa Basìliga de Santu Pedru, dae su Paba Zuanne Paulu su de II, isseberende comente mutu “Soli Deo” (“Petzi a Deus”).

Elevadu a su rangu de cardinale diàconu de s’Annuntziadura de sa B.B.M. in Via Ardeatina dae su Paba Zuanne Paulu su de II in su cuntzistoru de su 21 de frearzu de 2001, est istadu Prefetu de su Tribunale Supremu de sa Sinnadura Apostòliga. In prus de custu, est istadu membru de sa Cungregadura de su Curtu Divinu e de sa Dissiplina de sos Sagramentos, de sa Cungregadura de sa Dotrina de sa Fide, de sa Cungregadura pro s’Evanzelizadura de sos Pòbulos e de su Cussizu Pontifale pro sos Testos Lezisrativos.

Dae su 2004, fiat Prefetu emèritu de su Tribunale Supremu de sa Sinnadura Apostòliga.

Est obitadu su 18 de santugaìne de 2006 in Otieri. Est interradu in sa catedrale de Otieri.