Màriu Piga

Màriu Piga (Lu Palau, 29 de maju de 1953) est un'assussadore de fùbalu e fubaleri antigu sardu (zogaiat in sa posissione de atacadore).

Carrera

Zogadore

At cumintzadu sa carrera in su 1972 in s'echipa de sa bidda sua, su Palau, chi partetzipaiat a su campionadu de amadores. In s'istajone 1973-1974, aiat printzipiadu sa carrera profissionale in sa sèrie C cun sa Torres, in ue fiat abarradu duas istajones in antis de disputare àteros tantos campionados de sa de tres sèries in sa Luchesa, paris cun frade suo cròbinu Marcu.

In su 1977, fiat istadu cuntratadu dae s'Atalanta in sa Sèrie A, chi non l'aiat dassadu s'istrenare tzedende-lu a s'Abellinu in sa Sèrie B. S'11 de làmpadas de 1978, in s'ùrtima zorronada de su campionadu de Sèrie B 1977-1978, aiat marcadu contra a sa Sampdoria su golu de s'1-0 chi aiat sinnifigadu s'artiada de sos irpinianos a su turneu prus importante. Cun s'Abellinu si fiat istrenadu in sa Sèrie A in s'istajone posteriore e aiat zogadu pro chimbe istajones in totale.

A pustis l'aiant tzèdidu a su Peruza in sa Sèrie B, in antis chi torraret a sa sèrie A cun sa camiseta de sa Làtziu (1982-1983).

Sa carrera sua incruit finas duas istajones cun su Palermu (Sèrie C1 e Sèrie B) in antis de torrare a s'echipa chi l'aiant lantzadu a su fùbalu profissionale; difatis, aiat determinadu finas s'artiada de sa Torres a sa Sèrie C1 in s'istajone 1986-1987, marchende su golu detzisivu a sa Lisàndria in s'ùrtima zorronada de su campionadu.

Aiat terminadu sa carrera in Tàtari in su 1989, a sos 33 annos. In su 1986, fiat abarradu imboligadu in s'iscàndalu de sas apostas fubalìstigas sufrende una suspensura de unu mese. In sa carrera sua, at tentu grobarmente 114 presèntzias e at logradu 9 realizaduras in sa Sèrie A, cando ch'in sa Sèrie B sas partidas disputadas sunt istadas 81 cun 6 golos marcados.

Assussadore

Comente assussadore, a caddu intre su 1996 e su 1997, at leadu sa timona de sa Torres, resessende a evitare sa falada dae sa Sèrie C2 in su 1997 e sende despedidu pagos meses a pustis.