Nicolae Ceausescu
logudoresa. Abbàida sas àteras bariedades gràficas:
campidanesu · LSC · nugoresu
Nicolae Ceaușescu (Scornicești 26 de ghennàrgiu 1918 - Târgoviște 25 de nadale 1989) est istadu unu ditadore comunista rumenu chi at gubernadu in manera totalidària su paìsu dae su 1965, addaghi fiat istadu numenalizadu dae su cumitadu tzentrale de su partidu, finas a sa ruta sua in su 1989.
Mancari Ceaușescu no apat cuntzèdidu mai nudda in matèria de liberdades tziviles, sa zestione sua econòmiga fiat istada caraterizada dae prosperidade relativa in sos primos deghe annos de su rezìmene suo, gasi comente dae una postura moderada in su terrinu internassionale, gràssias a sa cale si fiat balanzadu sos favores de numerosos gubernos otzidentales.
Sende gasi, in sos annos otanta nche fiant essidos a pizos de aba totu sos iscunsertos de sa ditadura sua, cun sufrimentos de non poder narrer pro sa pobuladura, custa bia finas de creze econòmiga. In particulare, sos ùrtimos chimbe annos cun Ceaușescu in su podere fiant istados particularmente tostos pro sos rumenos: su tiranu, pro pagare su dèbitu isternu, isportaiat belle totu sas siendas alimentares, cun sa cunseghèntzia chi sas butegas fiant azomài boidas e sa pobuladura patiat su fàmine; in sos mezus casos, sos rumenos fiant custrìnghidos a coas longas in dae in antis de sas butegas pro poder comporare su mìnimu pretzisu pro subrabiver.
In prus de custu, su rezìmene de Ceaușescu si fiat fatu galu prus repressivu: petzi pro fontomare carchi cosa, unu nassionale rumenu non fiat lìberu de tenner relassiones cun istranzos, e pro andare a bisitare un’amigu arribende dae un’àteru paìsu chi fiat internadu in s’ispidale teniat bisonzu de sa dimanda ufissiale de s’impreadore suo inche sa polima e fiat netzessàriu unu permissu foras male pro possuer una màchina de iscrier. E finas sas minorias ètnigas, che s’ungheresa (rapresentende a inghìriu de su 7% de sa pobuladura), fiant sutapostas a repressura forte, sena chi lis èsseret prus garantidu su deretu de impreare sa limba issoro.
In 1987, una rebellia in sa tzidade de Brașov fiat istada sufogada sambenosamente dae Ceaușescu. Sende gasi, cun s’istrampada de su comunismu in totu s’Europa, sa sorte de su tiranu oramài fiat de non poder evitare: in su nadale de su 1989, una rebellia pobulare fiat fuìda in Timișoara e si fiat istèrrida a totu su paìsu.
Sa rebolussione fiat istada arrimada belle deretu dae s’armada; in pagas dies, su rezìmene de Ceaușescu nche fiat rutu, a pustis de dassare unas 60.000 bìtimas. Su tìranu e muzere sua, galu prus intransighidora e fanàtiga, fiant istados detènnidos e fusilados. Pro sa Rumania fiat agabadu un’amutadore.
Ceaușescu est amentadu comente unu de sos ditadores prus brutales e sambenosos de s’istòria.