Ozastru

S' ozastru est una mata semper birde, in sos artos de chirrios nostros bi nd'at in tottube, mascamente inube b'at molas de chessa. Est una mata seculare, podet vivere fintzas a chimbe-deche seculos e artziare fintzas a ses metros, mancari chi a bellu a bellu. Su truncu est a colore de chisìna e lisiu, sos chimos trotos e ispinosos, sas fozas ovales e birdes in su chirru de susu, colore de prata issutta. Sos frores sun arbos e minores, su frutu, a forma de ovu, a primu birde, posca nigheddu-rujastru, est prus minudu de s'olìa.

In Sardinna an cumintzau dae s'Edade de Mesu a innestare sos ozastros a olìa e ispremìan su frutu de s'una e de s'atera mata in sas molas de preda. Dae s'ozastru bessit pacu ozu, ma fachet andare de corpus. Su brodu de sas fozas, iscotadas pacos minutos, est disinfettante, fachet bene a sa pressione, istringhet e che fachet sanare becos e trincos. Sos pastores zaìan sa sida a su bestiamine, mascamente in annadas malas, sos chimos sicos che los carraban a domo a facher focu. Chin sa linna de s'ozastru fachìan birillos e bardùfulas, a ispelegu de pitzinnos e de mannos; chin sos chimos bonos si fachina sas furchiddas pro su tirelasticu.