Abbamele

Articulu in nugoresu

Su abbamèle, connòttu fìntzas comente abbatu o abbatzu, est unu màndicu anticu de sa Sardìnna fattu mascamènte in sos trètos a economìa pastorale.

Produssione

Cando sas arrègras si mùrghent, si pònent a banda sas bòtzas de chèra chi tènent su 20-30% de mele. A pùstis de nd'àer bocàu tottu su mele chi resèssit a nch'essìre a foras, sas arrègras si pònent a iffùnder in abba caènte meda (~ 50 °C), de manèra chi s'abba isòrvat tottu su mele chi gàlu b'at. A custu puntu, chin sas manos si disfàchent tottus sos crùmos de chera e póddine. Sa chera si tòrrat a mùrgher e si mantènet a banda. Dùncas s'abba si fìltrat assumàncu duas bortas, a esèmpiu chind unu pànnu de lìnu, e chèret pòsta ind unu pajòlu mannu: tàndo si cumìntzat a buddìre. In su mèntras si bi pòdet annàngher carchi còrju de aràntzu o limòne. Su colore bènit sèmper prus iscùru e su sapore, pro mòre de sa cuntzentrassiòne, prus dùrche. Si accàbbat de sichìre a caentàre cando su lìcuidu pìcat una cussistèntzia de mele: su pajolu si pònet ind unu lòcu abbandiàu e su chi in intro bi resùrtat, in àntis de che lu pònner in vasìttos, si làssat bene a intepiàre.