Antonello Mura

Custu artìculu est iscritu in sa grafia campidanesa. Abbàida sas àteras bariedades gràficas:

logudoresu · LSC · nugoresu

Antonio Mura
pìscopu de sa Crésia Catolica
Tìtulu:	pìscopu de Nùgoro e Lanusei
Incàrrigos atuales:	presidenti de sa Ces
Incàrrigos betzos:	pìscopu de Lanusei aministradori apostòlicu de Lanusei

Antonio (nòdidu Antonello) Mura (Bortigale, 28 mes'e idas 1952) est unu pìscopu catòlicu italianu, de su 2 de trìulas 2019 pìscopu de Nùgoro, de su 14 de gennàrgiu 2020 presidenti de sa Cunferèntzia obispali sarda e de su 9 de abrili 2020 pìscopu de Lanusei.

Biografia

Nascit in Bortigale, in provìncia de Nùgoro e diòcesi de S'Alighera, su 28 de mes'e idas 1952.

Pesadia e ministèriu satzerdotali

Cumprit is stùdius superioris ande s'istitutu tècnicu po geòmetras de Macumere e, a pustis de dus annus de universidadi, de su 1974 frecuentat su seminàriu. Cunsighit ande s'Universidadi Pontifìcia Salesiana su bacalaureau in Filosofia e in Teologia, duncas sa licèntzia in Teologia Dogmàtica ande sa Facultadi Pontifìcia Teològica de sa Sardigna e sa làurea in Pedagogia e in Filosofia, a s'Universidadi de is stùdius de Tàtari.

Su 1 de austu 1979 est ordinau presbìteru, in sa crèsia parrochiali de santa Maria de is Angelus in Bortigale, de s'archipìscopu Francesco Spanedda. Su primu incàrrigu chi coberit est su de vice-vicàriu in sa parròchia de Santu Franciscu in Macumere.

In su 1982 est numenau animadori de su Seminàriu regionali sardu de Casteddu.

De su 2012 a su 2014 est vicàriu obispali po sa cultura e pàrracu de sa parròchia de su Nòmini Santìssimu de Gesùs in S'Alighera.

Ministèriu obispali

Su 31 de gennàrgiu 2014 papa Franciscu ddu nòminat pìscopu de Lanusèi; sucedit a Antioco Piseddu, dimìtidu·si po cròmpidas làcanas de edadi. Su 25 de martzu arricit s'ordinatzioni obispali, in sa cuncatedrali de sa Cuncetzioni Imaculada de Bosa, de s'archipìscopu Giovanni Angelo Becciu (posca cardinali), co-cunsagrantis su pìscopu Mauro Maria Morfino e s'archipìscopu Arrigo Miglio. Su 27 de abrili pigat possessu de sa diòcesi.

Su 2 de trìulas 2019 su matessi papa ddu nòminat pìscopu de Nùgoro, lassendi·ddu aministradori apostòlicu de Lanusèi; sucedit a Mosè Marcia, dimìtidu·si po cròmpidas làcanas de edadi. Su 15 de cabudanni 2019 pigat possessu de sa diòcesi, in sa catedrali de Santa Maria de sa Nie in Nùgoro.

Su 14 de gennàrgiu 2020 est elìgiu presidenti de sa Cunferèntzia obispali sarda, e po tantu coberit fintzas s'incàrrigu de grandu cantzilleru de sa Facultadi Pontifìcia Teològica de sa Sardigna.

Su 9 de abrili 2020, papa Franciscu at uniu in persona episcopi is diòcesis de Nùgoro e Lanusei, nominendi·ddu torra pìscopu de cust'ùrtima sedi, pighendi·sì possessu su 27 maju.

Genealogia obispali

Sa genealogia obispali est:

• Cardinali Scipione Rebiba
• Cardinali Giulio Antonio Santori
• Cardinali Girolamo Bernerio, O.P.
• Archipìscopu Galeazzo Sanvitale
• Cardinali Ludovico Ludovisi
• Cardinali Luigi Caetani
• Cardinali Ulderico Carpegna
• Cardinali Paluzzo Paluzzi Altieri degli Albertoni
• Papa Beneitu XIII
• Papa beneitu XIV
• Papa Clementi XIII
• Cardinali Marcantonio Colonna
• Cardinali Giacinto Sigismondo Gerdil, B.
• Cardinali Giulio Maria della Somaglia
• Cardinali Carlo Odescalchi, S.I.
• Pìscopu Eugène de Mazenod, O.M.I.
• Cardinali Joseph Hippolyte Guibert, O.M.I.
• Cardinali François-Marie-Benjamin Richard
• Cardinali Pietro Gasparri
• Cardinali Clemente Micara
• Cardinali Antonio Samorè
• Cardinali Angelo Sodano
• Cardinali Giovanni Angelo Becciu
• Pìscopu Antonio Mura