Ausbausprache - Abstandsprache - Dachsprache

Articulu in nugoresu

Ausbausprache - Abstandsprache - Dachsprache est un'istrumentu isviluppau in materia de sotziolinguistica pro dare analisi a sas limbas e limbazos, e abberguare si un'idioma si podet cussiderare comente limba o dialetu.

Est un'imbentu de Heinz Kloss, chi àt fattu impreu de nòmines, a manera de facher craresa pro su chi pertoccat duos criterios: su primu trattat de sa funtzione sotziale de s'idioma in chistione, e s'atteru imbetzes de su profilu linguisticu in isse etottu.

Su faveddu "Ausbausprache" serbit a inditare un'idioma chi tenet unu vocabolariu, una grammatica e ortografia fattas a istandard, chi si nde fachet impreu in s'amministrassione prubbica e dontzi campu de sa sotziedade: duncas, est sa limba ufitziale de istadu a s'ispissu. Imbetzes, s'idioma chi si narat non-Ausbausprache est s'allega de su contestu informale, chi no tenet tradissione literaria peruna e bi est in fromma orale ebbia.

Sa limba abstand (Abstandsprache) non presentat nudda a cummone chind un'attera e, duncas, non si podet cussiderare comente unu dialetu: picamus a esempiu sa limba basca.

Su Dachsprache est un'idioma chi serbit, comente istandard, pro parare fronte a sa presentzia de paritzos dialetos e limbazos chi est impossibile a los cumprender tottus.