Buccas de Bonifatziu

Articulu in logudoresu

Sas Buccas de Bonifatziu (in corsicanu Bucchi di Bunifaziu, in bonifatzinu Bocche de Bunifazziu, in gadduresu Bocchi di Bunifaciu, in frantzesu Bouches de Bonifacio) est unu istrintòrzu de mare tra Còssiga e Sardigna, goi numenada pro sa bidda corsicana de Bonifatziu, e partzit su mare Tirrenu dae su mare Mediterraneu otzidentale. Dae su puntu chi est prus a probe, est longu 11 km e profundu massimu 100 m. Sas Buccas sun fentomadas tra sos marineris pro sas currentes de abba tottu bulluzadas e periculosas.

Buccas de Bonifatziu in sa mapa.

Su disaccattu prus connottu in sas Buccas de Bonifatziu fit cussu de sa frigada frantzesa Sémillante in su 15 de frearzu de su 1885. Sémillante aìat lassadu su portu de Tulone sa die innantis de andare conca a su Mare Nieddu, pro dare azudu in sa gherra de Crimea. Una temporada aìat però giuttu sa nae a si stumbare ind una costera: sa nae fit falada a giossu e non bi nde fit abarradu mancu un'omine, de sos 750 chi fin in cue.

A pustis chi una nae mercantile aìat cajonadu un'atteru disaccattu mannu, est proibidu a colare in sas Buccas a sas naes chi battin cosa chi imbruttat s'ambiente.