Chilivane

apendìtziu de sa bidda sarda de Othieri

Chilivane est unu trighinzu de sa comuna de Otieri, posta in sa provìntzia de Tàtari, e contat cun unos 300 abitadores. Est un’agrugadorzu ferruviàriu de sinnìfigu, dae ue s’arrampant duos rugros, chirru a Tàtari e a Terranoa e Figari respetivamente. In prus de custu, tenet un’ipòdromu chi est in mesu de sas istruturas de echitadura prus importantes de sa Sardinna e de s’Itàlia.

Creja de su Sacru Coro, Chilivane
Istatzione ferruviària

Chilivane s’agatat in su Logudoro, a unos 6 km. dae Otieri e 40 dae Tàtari. A curtzu de sa leada, curret su Riu Mannu de Otieri, chi posteriormente si ghetat a sas abas de su Lagu de su Coghinas.

Custu assentadorzu fiat nàschidu in tempus de su fraigamentu de sa lìnia ferruviària Casteddu-Figari e de s’arrampamentu suo pro Tàtari e Portu Turre, acontèssidu in sa segunda metade de su de XIX sègulos dae bandas de sa Cumpanzia Reale de sos Caminos de Ferru Sardos, aderetada dae Benjamin Piercy.

Su sartu a s’uestu de Otieri, difatis, fiat istadu isseberadu pro bi fraigare su transitadorzu, numenadu prus a tardu Chilivane, dae ue, dae sa lìnia printzipale, si diat esser arrampada sa lìnia pro ambas leadas turresas.