Editto delle Chiudende
Articulu in logudoresu
| « Tancas serradas a muru,
fattas a s’afferra afferra, si su chelu fit in terra, che l’aian serradu puru » | |
S’editto delle chiudende (o editu de sas cungiaduras[1][2] in sardu), fit una reforma agrària chi, emanada in su 1820 dae su re de Sardigna Vittorio Emanuele I, at permissu in Sardigna de fàghere sas tancas serrende sos terrinos, chi finas a tando fint a cumone. Gai est istada introduida sa propiedade privada, cun sa punna de modernitzare e isvilupare s’agricoltura.
Reformas de gai fint istadas fatas in ateras partes de s’Europa, comente a esempiu in Inghilterra, in ue sas tancas fint jamadas enclosures. Su fatu est peroe chi, in Sardigna, sa reforma agrària de sos Sabaudos no aiat tentu contu de su fatu chi non si podiat fàghere sa propiedade perfeta proite bi fit ancora su feudalèsimu.
In tzertas biddas de s'isula (in Logudoro e in Campidanu) sa leze calicunu l’aiat accolta cun s’isperàntzia de mezorare, finas pro su fatu chi b’aiat medas massajos e, serrèndesi su logu, podiant istare pius serenos ca no bi fit su perìculu chi b’intrerat bestiàmine, ma custos fint pagos, sa prus parte de sa zente non fit cuntenta.
In Barbàgia e in Ozzastra sa cosa non fit atzetada pro nudda proite privatizende sos terrinos, chi poi fint sos pàsculos, sa sienda principale de su tretu issoro, sos pastores aiant ite malu passare.
A manu a manu chi sos càmbios beniant postos in essere, sas protestas e sas atziones de sabotàgiu aumentaiant. Zente meda, chi fit abbarrada chena nudda, aiat cominzadu a bandidare. Tando sos Sabaudos aiant acontzadu s’editu in su 1830 e in su 1831, ma su malumore fit meda, est in custos annos chi Melchiorre Murenu aiat cantadu sos versos chi sunt in subra.
Riferimentos
modìfica- ↑ (IT, SC) Alla MEM lingua sarda e autodeterminazione con Desula - Assemblea Natzionale Sarda, in assembleasarda.org, 4 martzu 2023. URL consultadu su 5 maju 2024.
«Una de custas caraterìsticas est istada, in su 1823, sa capatzidade de s’autodeterminare in reatzione a s’Editu de is Cungiaduras, chi cun Règiu Decretu poniat fine formalmente a s’impreu pùblicu de is terrinos, introduiat sa propiedade privada e ghetaiat gasi in su caos comunidades intreas chi dae tempus meda si sustentabant cun su cumpartzimentu de is terras a impreu tzìvicu.». - ↑ Gianni Muroni, Sardigna prima colònia sabàuda?, in Limba Sarda 2.0, 2 austu 2023. URL consultadu su 5 maju 2024.
«Non mancant riferimentos istòricos, dae Angioy a s’editu de sas cungiaduras, dae sa fusione perfeta a sa “cassa manna” de su 1899.».
Bibliografia
modìfica- Frantziscu Tzèsare Casula, Sìntesi de Istòria Sardu-Italiana, Tàtari, Delfino, 2011, ISBN 978-88-7138-606-5.
- (IT) Raimondo Carta Raspi, Storia della Sardegna, Milanu, Mursia, 1971, ISBN 9788842506850, OCLC 462998915, SBN IT\ICCU\TO0\0752056.
- (IT) Francesco Cesare Casula, La storia di Sardegna, Tàtari, Delfino, 1994, ISBN 88-7138-063-0.
- (IT, SC) Circolo culturale sardo Logudoro, Regione autonoma della Sardegna, Federazione Associazioni sarde in Italia, Dalla cacciata dei piemontesi (1794) alla "perfetta fusione" (1847) e all'autonomia regionale (1948) : Convegno in occasione della celebrazione de Sa die de sa Sardigna, Circolo culturale sardo Logudoro, 2012.
- (IT) Omar Onnis, La Sardegna e i sardi nel tempo, Casteddu, Arkadia, 2015.
- (IT) Francesco Casula, Carlo Felice e i tiranni sabaudi, 1ª ed., Grafica del Parteolla, 2016, ISBN 978-88-6791-124-0, OCLC 980297209.