Eliseo Spiga

iscritore e polìticu sardu
Custu artìculu est iscritu in sa grafia logudoresa. Abbàida sas àteras bariedades gràficas:

campidanesu · LSC · nugoresu


Eliseo Spiga (Aosta 1930 - Casteddu 2009) est istadu un'iscritore e politicu sardu.

Biografia modìfica

Naschet in Aosta su 14 de Lampadas 1930, dae babbu e mama disterrados dae sa Sardigna pro rejones vagamente politicas. Luego torradu a Sardigna bivet mascamente tra Casteddu, ue finit sos istudios, Quartu e Quartucciu. Dae minore est signadu dae sas tragicas esperientzias chi bivet, comente sa gherra e totu su famine, s'assustu e sas maladias chi si giughet in fatu, sa bida tribolada de una famiglia de massajos e oberajos.

Est in su clima culturale de su dopoguerra chi cumintzat a intender su carignu de cussu bentu de bideas e cumbinchimentos chi ant a dominare sos annos benidores; s'atopu e sa connoschentzia cun Emilio Lussu, iscritore famadu e gherradore sardista e antifascista, est unu eventu garrigu de cunseguentzias pro totus sos isseberos chi Eliseo at a faghere in bida. Detzidit, infatis, de si dare a sa politica, in s'ala de manca de s'ischieramentu, e in pagu tempus diventat protagonista: a primu in su PCI, a de poi in su PSd'Az. Est unu de sos fundadores de su tzirculu Città - Campagna, de sos periodicos Nazione Sarda e Tempus de Sardigna, su primu chi apat pessadu a unu sindacadu etnicista, su chi dae poi esseret diventadu sa CSS. A s'impinnu politicu s'accumpanzat unu istudiu sighidu a subra de sas chistiones fundamentales de sa cultura sarda, su sardismu, s'autonomismu e pro una torrada a nou economica e sotziale isulana.

In su 1968, cando Eliseo fiat oramai a tesu dae su PCI e dae tota sa manca istitutzionale, bessit unu liberu tituladu Sardegna, rivolta contro la colonizzazione, chi Eliseo firmat cun su "numenalzu" Giuliano Cabitza, in ue bessint a pizu sas bideas suas de unu autoguvernu comunidariu sardu comente s'unica prospetiva pro s'isula. Dispaciados sa tzitade, sos partidos, su comunismu, s'Istadu, Eliseo torrat a una bisione de sa Sardigna comente no si nde bidiant dae tempus e chi at a mantenner fintzas a s'ultima die de bida. In su 1998 benit imprentadu Capezzoli di Pietra, Zonzo Editore. Sa matessi domo imprentadora pubricat unu ateru liberu, chi Eliseo iscriet paris cun s'iscritore e poeta Francesco Masala e su filosofu Placido Cherchi, tituladu Manifesto della gioventù eretica e del comunitarismo, chi proat a ammustrare una ligadura intro sa cultura sarda nuragica e sa de oe, interpretende totu in "giae comunidarista". A sa fine de su 2006 sa domo imprentadora CUEC faghet bessire s'ultimu liberu de Spiga, tituladu La sardità come utopia. Note di un cospiratore, in ue s'autore contat sas esperientzias suas de bida e de politica e, mascamente, proat a inzitare sa umanidade comente unicu remediu pro sos populos de Sardigna e de su mundu intreu minetados dae sa modernidade e dae filosofias comente su positivismu ei su liberalismu.

Eliseo Spiga si ch'est mortu in Casteddu Gioia, su 19 de Sant'Andria, 2009.

Iscrittos suos modìfica

  • (IT) Giuliano Cabitza, Sardegna: rivolta contro la colonizzazione, Milanu, Feltrinelli, 1968, OCLC 797409012.
  • (IT) Eliseo Spiga, Capezzoli di pietra, Casteddu, Zonza Editori, 1998, OCLC 40647496.
  • (IT) Eliseo Spiga, Francesco Masala e Placido Cherchi, Manifesto della gioventù eretica del comunitarismo e della Confederazione politica dei circoli, organizzazione non-partitica dei sardi, Casteddu, Zonza Editori, 2000, OCLC 879953396.
  • (IT) Eliseo Spiga, La sardità come utopia: note di un cospiratore, Casteddu, CUEC, 2006, ISBN 978-88-8467-352-7, OCLC 237105827.

Iscritos subra Eliseo Spiga modìfica

Ligàmenes esternos modìfica

Controllu de autoridadeVIAF (EN24101806 · ISNI (EN0000 0000 4048 2228 · LCCN (ENnb2001030146 · WorldCat Identities (ENnb2001-030146