YouTube

Custu artìculu est iscritu cun sa grafia Limba Sarda Comuna. Abbàida sas àteras bariedades gràficas:

campidanesu · logudoresu · nugoresu

YouTube est unu situ web pro cumpartzire videos chi tenet sea in San Bruno, Califòrnia. Su servìtziu l'ant imbentadu tres ex-impiegados de PayPal in su mese de freàrgiu de su 2005 e lu mantenet Google dae tardu 2006. Su giassu permitit de pònnere, abbaidare e cumpartzire vìdeos, e faghet impreu de sas tecnologias Adobe Flash Video e HTML5 pro fàghere bìdere una variedade manna de videos chi sos utentes nche ponent a intro. Su chi bi at sunt pelliculeddas minores (video clips), videos in ue si ascurtat mùsica, ma fintzas vìdeos educativos e de àtera genia.

YouTube situ web
Logo
Ischermada de su situ
URL	www.youtube.com/
Casta de situ	prataforma in lìnia pro sos vìdeos
Limba	multiple languages
Mere	YouTube e Google
Abertura	14 freàrgiu 2005
Islogan	Broadcast Yourself

Su prus de su chi b'at in YouTube est de persones sìngulas, ma bi at fintzas su contributu de siendas che sa CBS, BBC, Vevo e Hulu a mustrare unu pagu de materiale issoro pro mèdiu de su canale Youtube issoro, gràtzias a su programma de partnership. Gente chi no est registrada podet puru abbaidare videos, ma sos chi lu sunt nche podent pònnere una cantidade manna. Totus sas pellìculas chi sa comunidade diat pòdere cunsiderare comente ofensivas o ingiuliosas sunt petzi pro sa gente chi est registrada e tenet a su nessi 18 annos.

Youtube, LLC si ddu at comporadu Google pro unu milliardu e 65 milliones de dòllaros in su mese de santandria de su 2006 e como est parte de su servìtziu chi Google ponet a disposta de su pùblicu.

Ligàmenes esternos

• Pàgina printzipale, in youtube.com.