Open main menu

Erich Priebke (Henningsdorf, 29/07/1.913-Roma, 11/10/2.013) est istadu unu criminosu de gherra alemannu, cabitanu de sas SS in tempus de sa segunda gherra mundiale, cundennadu a sa presonia perpetuada pro aer leadu parte a sa pranifigadura e a sa realizadura de s'abasatu de sas Tofas Ardeatinas.

Si fiat marcadu a su Partidu Nassionale-Sotzialista de sos Traballadores Alemannos in su 1.933, innodidende-si comente membru sòlidu e determinadu. Custas caraterìstigas l'aiant agradadu a Heinrich Himmler, chi l'aiat intradu a sas SS, in ue Priebke nch'aiat sizidu sa graduadura de cabitanu.

A pustis de sa callada de armas e finas a su mese de maju de 1.944, òperat in Roma suta de su mandu de Herbert Kappler. Posteriormente a s'atentadu chi sos Grupos de Assione Patriòtiga (o GAP) aiant realizadu contra a una cumpanzia de su batallone Bozen in via Rasella, su 23 de martzu de 1.944, Kappler aiat cumandadu sas isecutaduras de 335 ostazos, a fusilare pro represalla in sas Tofas Ardeatinas.

Sa sentèntzia de cundenna evidèntziat su caràtere erradu de su logu comunu cunforme a su cale sa leze de gherra diat aer permìtidu sa fusiladura de 330 presoneris (unu pro onzi sordadu alemannu mortu in s'atentadu) comente represalla de s'atentadu de via Rasella, e chi su meru nùmeru de sas bìtimas fusiladas, 335 pessones (chimbe in prus), siat istadu s'ùnigu cabu de imputadura a càrrigu de Priebke (sende sas àteras 330 cussideradas comente obedèntzia a sos cumandos). Sa cundenna, difatis, est istada pronuntziada pro totu sas 335 bìtimas de s'abasatu.