Fogu de campusantu

Articulu in logudoresu

Su fogu de campusantu (connoschidu fintzas cun atteros nòmines peri tottu sa Sardigna, comente Ziròne in Logudoro, focu de sas animas in su trettu de Nugoro e fogu de Sant'Elmu in Campidanu) sun frammigheddas de colore turchinu chi si manifestan a libellu de su terrinu in tzertos logos, comente appuntu sos campusantos, ma fintzas padules e istànios. Su periodu menzus pro los bìder est a tardu, in sas dies de su mese de Austu.

Finghidura de unu fogu de campusantu.

Si trattat de frammigheddas chi benin dae su brujamentu de metanu e fosfanu, dèbidu a su pudrìmine de restos organicos.

Sos contos a pizu de sos fogos de campusantu sun paritzos. In s'antigòriu, si naraìat chi fin sa proa de s'esistentzia de s'anima in intro de su corpus. Calicuna populatzione nordica, imbètzes, creìat chi a los sighire si podìat agattare su propriu destinu.