Mortu mortu

Articulu in nugoresu

Su mortu mortu (italianitzau: morti morti, in galluresu: li molti molti), connottu fintzas comente peti coccone, su pane ‘e su tocu, is ànimas, is panixeddas e su biddiu longu este una ricorrentzia traditzionale chi, cada annu in Sardinna, festat sa Die de sos Mortos.

Sas paragulas chi dàen nùmen a sa festa sun cussas chi sos pitzinnos, a s'ispissu battinde unu luminu e/o ponendesi a conca una bisera, imprèan a s'attu de petire sas offertas colande dae dommo a dommo de bidda, nànde pro esempiu cara a su mere de dommo o tzilleri "sòe su mortu mortu!", "peti coccone!", "seus bènnius po is animeddas!" e gai sichinde. Tando sos mannos, chi non lis depet mancare nudda, lis fachen offerta de cada zenia a sos minoreddos, chi sìch'andan cuntentos chin cosa de mandicare.

Sa festa de su "mortu mortu" si assimizat meda a cussa, meda prus fentomada e isparghinada peri su mundu dae sa curtura de massa, de Halloween, sende chi s'orizine antica fit sa matessi chin tottu probabilidade. Festas gai fin praticadas in tottu s'Europa, ma pacos locos las an mantesas.

Dontzi rezone istorica de Sardinna tenet una manera sua pro facher offerta a sos mortos, e si fachet a su solitu in su duos de Sant'Andrìa chin meda partetzipadura populare. A bìas, fintzas sos mannos colaban a pedire offertas, comente a unu cumbidu de una tassichedda de binu o licore de murta.