Polu norte

Custu artìculu est iscritu cun sa grafia Limba Sarda Comuna. Abbàida sas àteras bariedades gràficas:

campidanesu · logudoresu · nugoresu

Su trèmene polu norte o polu nord inditat in generale su puntu prus a norte (o prus a setentrione) de unu cale si chi siat ogetu astronòmicu (pro esempru unu praneta o un'isteddu) e pro cunventzione est impreadu che a sistema de riferimentu primàriu respetu a su polu sud.

Mapa de su polu norte. Su polu norte geogràficu (1), su polu norte magnèticu (2), su polu norte geo-magnèticu (3) su puntu prus istesiadu de is terras (84°03' north, 174° 51' west) (4).

Faghende riferimentu a sa Terra, su trèmene podet inditare diversos puntos geogràficos postos subra de sa superfìtzie terrestre, sa majoria de is cales sunt situados in s'otzèanu Àrticu, e est impreadu fintzas pro si refèrrere in manera genèrica a cussa regione de su mundu denominada Àrticu o in unos cantos casos a su territòriu cumprèndidu a s'internu de su tzìrculu polare àrticu. Cun "polu norte" si podet fintzas inditare su polu magnèticu positivu (P) de unu magnete.