Articulu in campidanesu

Efis (in latinu Ephysius; Elia de Antiochia, 250 - Nora, 15 de gennarxu 303) est stètiu unu sordau e màrtiri romanu, venerau cumenti santu de sa Crèsia catòlica. Est connotu in totu sa Sardìnnia e meda in Casteddu, chi in sa primu dì de maju ddu afestat cun d-una festa manna arregordendi sa liberatzioni de sa citadi de sa pesti.

Stàtua de Sant'Efis

Vida modìfica

De sant'Efis ddui est una "passio", contu de sa vida e de su martìriu suu: Efis fut orientali, fortzis originàriu de Elia de Antiochia, in sa Turchia dei oi. Fut unu militari a su tempus de s'imperadori Diocletzianu (243-313 d.C.). Mandau in Itàlia po gherrai contra is cristianus, innoi si cunvertit a su cristianèsimu. Partit de Gaeta e lòmpit in Casteddu aundi si professat cristianu ananti a is giùixis e, giuigau curpevoli e cundannau a morti, benit mandau a Nora, in su tempus citade prus de importu. In sa praja de Nora Efis est scabitzau.

Cultu modìfica

« In Casteddu, in Sardìnnia, sant’Efis màrtiri, chi, in sa persecutzioni de Diocletzianu, asuta de su giùixi Flavianu, apustis de ari probassau po virtudi divina meda turmentus, a sa fini, decollau, bincidori si nd’est bolau a su celu. »
(Martyrologium Romanum, 1955)

Sant'Efis, venerau su 15 de gennarxu, est patronu de sa provìncia eclesiàstica casteddaja, de su comunu de Cabuderra e de sa Brigada Tàtari.

Is relìcuias de sant'Efis funt stètias a lestru cunserbadas e po meda tempus fiant in Pisa, aundi s'est pesau su cultu. Is crésias prus de importu intituladas a su santu funt In Casteddu, in su bixinau de Stampaxi, e in sa praja de Nora aundi at lograu su martìriu. Po su santu si scallant tres votus: su de su Giòbia Santu, su de su Lunis de Pasca po sa liberatzioni de is afrentas de is frantzesus rivolutzionàrius, e su de su 1 de maju po sa liberatzioni de sa pesti.

Sa Festa de su 1 de maju modìfica

In Casteddu de su 1657 si cèlebrat sa Festa de Sant'Efis, in su 1 de maju, una processioni cun sa stàtua de su santu chi bessit de sa crèsia de Stampaxi po andai a sa crésia de Nora.[1] S'itineràriu, chi tocat Giorginu, Cabuderra, Sarrocu, Santu Perdu e Pula, cun is 65 km suus percurtus in 4 diis est sa processioni a pei prus longa de su Mesuterràinu.

Notas modìfica

  1. Manuela Ennas, Sant’Efis de is miràculus. Poita est chi si ddus pedint, in Sardiniapost, 18 martzu 2020. URL consultadu su 3 maju 2020.