Sechestru de Silvia Melis

Su sechestru de Sìrvia Melis est istadu unu casu de recatamentu acontèssidu in Sardinna in su 1997: sa bìtima de su recatamentu fiat istada Sìrvia Melis, un’imprendidora de Tortuelie. Su sechestru naradu est cunnotu finas pro s’imboligamentu de pessonazos che Nicolau Grausu, a sos tempos imprentadore de “L’Unione Sarda”, Luigi Lombardini su zuighe e Antoni Àngelu Liori su deretore de “L’Unione Sarda”.

Fatos

Su 12 de frearzu de 1997, Sìrvia Melis est recatada in s’ìnteri chi est torrende a domo sua in betura. Sos bandidos nche la leant a pustis de la ligare, infaletare e imbabajolare, dassende in s’automòbile a Lucas su minore, de bator annos. Su sechestru durat 265 dies: su 15 de triulas, sa negossiadura cun sos recatadores fiat intrada a sa fase finale, peroe s’addòviu cun sos bandidos pro su pagamentu de sa luissione no aiat tentu logu. Sìrvia Melis fiat istada tramudada a una tenda pro sas ùrtimas 74 dies, finas a cando, s’11 de santandria de su matessi annu, fiat resèssida a s’alliberare dae sa presone e fiat istada agatada a curtzu de Nùgoru in s’oru de unu caminu provintziale dae duos azentes bestidos a sa moda biddaresa.

A cussu puntu, cando chi Sìrvia Melis atrogat chi si nch’est fuìda ca sos recatadores si fiant allargados, sena pagare peruna luissione (posissione rapresentada dae sa famìlia Melis e dae sos zuighes), Nicolau Grausu s’imprendidore revelat chi at pagadu, in su sartu de Istèrsili, sa luissione pro s’alliberamentu de Sìrvia Melis. Sos zuighes casteddarzos aiant ismentidu cun firmesa chi èsseret istada pagada carchi bia una lussione, asseverende chi Sìrvia Melis si diat esser alliberada a sa sola. Sende gasi, Grausu aiat aguantadu forte in sas posissiones suas, agabende pro esser inchertadu pro azudu de malufaghedores e pro tentativu de iscurpimentu a dannu de Titu Melis.

Si sighint a pare diferentes teorias subra de sa lussione, intre sas cales sa chi diat esser istada pagada dae su Sisde, un’ipòtesis chi fiat istada definida “totarmente imazinada” dae Giorgio Napolitano su ministru de sos afares internos, finas a cando su 20 de santadria Titu Melis etotu aiat decraradu chi aiat pagadu isse totu sa luissione, chi milli milliones de francos betzos fiant istados postos a disponimentu dae isse, 400 milliones dae Grausu e àteros milli milliones dae cuntribuidores iscunnotos.