Stanis Dessy

Artìculu in LSC

Stanis Dessy (Àrthana, 1900 - Tàtari, 1986) fiat unu pintore sardu.

Stanis Dessy

Losa dedicada a Stanis Dessy In Àrthana.

Biografia

A pustis de su ginnàsiu in Casteddu s'est iscritu a s'Acadèmia de sas Bellas Artes in Roma. In su 1921 est torradu a Casteddu, in ue at fatu su professore de disinnu in s'Iscola de rieducatzione pro mutilados. Ciusa l'at cussigiadu de traballare comente tzeramista ma at a preferrere sa pintura. At fatu de modellu pro s'istàtua de L'Ucciso. At debutadu in sa mustra de su tzìrculu universitàriu catòlicu. In su 1922 su Giornale d'Italia at publicadu in sa pàgina sarda unu profilu de s'artista.

S'annu imbeniente at espostu in sa Cuadriennale de Torinu su ghissu Cinzio, retratu de su figiu de Ciusa. At incumintzadu a collaborare cun sa rivista Il Nuraghe e a traballare comente issenògrafu in sa Compagnia Stabile Sarda. In su '25 at espostu in sa III Biennale romana e in sa Mustra de arte de Casteddu. In su 1926 si nche est tramudadu a Tàtari. In su 1927 at incumintzadu a istudiare sa pintura tedesca e fiaminga. In su 1930 s'est cojuadu cun Ada Dessì. In su matessi annu at partetzipadu a sa segunda espositzione de litografia e xilografia in Chicago e at isperimentadu s'acuaforte ghiadu dae Melis Marini. In su mese de santandria est andadu a Parigi ma sena resurtadu perunu. At comporadu istampas antigas de Dürer e Rembrandt. Si dèdicat a su monotipu.

Piazza Azuni - 1952. Cunservadu in sa Pinacoteca Natzionale de Tàtari.

In su 1937 duas xilografias sunt incluidas in sa regorta de su "British Museum". In su 1938 in sa IX Sindacale Nuorese at bintu su prèmiu PNF pro sa pintura. In su 1940 at espostu in una personale de xilografia in sa Biennale de Venezia. In sa Biennale de su 1942 at espostu sa xilografia Notte di San Giovanni. In su 1944 at disinnadu paris cun Tavolara sa tèssera de su Partidu Sardu. In su 1949 at collaboradu cun sa rivista Ichnusa e s'est iscritu a su sindacadu regionale de sos artistas. In su 1952 at partetzipadu pro s'ùrtima bia a sa Biennale de Venezia.

In su 1956 at organizadu cun Tavolara sa V Mustra de intzisiones italianas. In su 1957 at partetzipadu a sa de sete mustras de su Premiu del Fiorino. In su 1959 in s'Unione sarda Frantziscu Màsala l'at acusadu de indiferèntzia pro sos problemas sotziales. Issu at rispostu chi sa pintura sua unu caràtere sotziale lu tenet, giai chi est destinada a li garantire su sustentamentu. In su 1960 at donadu sa pintura La Cena in Emmaus a su Collegium Mazotti. In su 1964 at espostu in una personale in sa Rassinna de xilografia sarda e piemontese de Torinu. In su 1977 s'aministratzione provintziale tataresa l'at dedicadu una mustra antològica.

Unas cantas òperas

• Cinzio (brunzu), 1921-22
• Mendicanti, 1924
• Ada nel giardino, 1927
• Zia Remondica, 1928
• Mendicanti di Monte Gonare (xilografia), 1930
• Ada (màrmaru), 1931
• Zio Paolo, 1939
• La Giustizia, 1943-45

Bibliografia

• (IT) Giuliana Altea e Marco Magnani, Stanis Dessy (PDF), in Grandi Monografie, Nùgoro, Ilisso, 2002, ISBN 88-87825-48-3, OCLC 51825389. URL consultadu su 27 santandria 2019 (archiviadu dae s'url originale su 23 austu 2022).
• (IT) Marco Magnani, Stanis Dessy (PDF), in I Maestri dell'Arte Sarda, Nùgoro, Ilisso, 2004, ISBN 88-87825-48-3, OCLC 51825389. URL consultadu su 27 santandria 2019 (archiviadu dae s'url originale su 16 nadale 2007).
• (IT) Roberta Vanali, Lo sguardo limpido e oggettivo di Stanis Dessy, in Artribune, 28 martzu 2014. URL consultadu su 27 santandria 2019.

Ligàmenes esternos

(IT) Òperas de Dessy in sa Pinacoteca de Tàtari, in pinacotecamusa.it.