TeleSardegna
Limba Sarda Comuna. Abbàida sas àteras bariedades gràficas:
TeleSardegna est un'emitente televisiva chi òperat in Sardigna, cun sede in Nùgoro.
Istòria
modìficaFundada in su 1988[1], at tentu sa prima sede sua in carrera Vitòriu Manuelle 13, e at incumintzadu a trasmìtere dae su canale uhf 28.[2] In sos annos a pustis at tramudadu sa sede sua a su nùmeru 21 de carrera Asproni, e dae su 2003 nd'est divènnida propietària s'editora nugoresa Caterina Cosseddu, chi nd'at sighidu s'isvilupu e sa crèschida in sos annos a pustis. Nàschida comente rete frunidora de servìtzios e cuntenutos, at operadu pro annos medas in sa provìntzia de Nùgoro, ue at permìtidu fintzas a àteras televisiones locales de trasmìtere cuntenutos issoro pro mèdiu de sos canales suos.[1] Cun su passàgiu a su digitale terrestre de segunda generatzione at incumintzadu a frunire petzi cuntenutos, sende chi sas frecuèntzia las at incumintzadas a gestire Eitower, s'operadore natzionale pro contu de s'istadu, ma est abarrada una de sas pagas emitentes in s'istadu italianu a sighire a èssere operadora de rete, fintzas si petzi in sas provìntzias de Nùgoro e de s'Ogiastra.[1] In su matessi tempus est colada dae su canale 14 a su 13, pedende e otenende de pòdere trasmìtere fintzas in sas àteras provìntzias, ue sa morte de àteras oto emitentes locales causada dae custu càmbiu de tecnologia[3] aiat lassadu unu bòidu mannu pro su chi pertocat a s'informatzione locale. In dies de oe tenet duncas una cobertura chi li permitit de arribbare a su 97% de sa populatzione sarda.[4]
Gràtzias a sos investimentos fatos in sos annos in contu de programmatzione, tecnologias de ripresa, digitalizatzione e trasmissione e a su traballu de sos dipendentes, chi incluint noe traballadores a tempus indeterminadu e bator collaboradores in sas provìntzias de Nùgoro, Tàtari e Terranoa-Tèmpiu, in su tempus est resèssida a tènnere unu sutzessu semper prus mannu[1], e in su 2021 at abertu una redatzione fintzas in Tàtari.[5]
Programmas
modìficaSu canale de TeleSardegna trasmitet tres castas de telediàriu: in sardu[6], in italianu[7] e in sa limba italiana de sos sinnos[8]. Sos programmas suos tenent temas medas, dae sa polìtica a su mundu de su traballu, de sos giòvanos e de s'isport. Fintzas custos si podent agatare siat in sardu (Tiri Tiri Fatos e Curiosidades) siat in italianu (Sardegna chiama Europa, EuroSport, Senza confini, Proposte isolane).[4]
Riferimentos
modìfica- ↑ 1.0 1.1 1.2 1.3 (IT) Alessandro Mele, La nuorese TeleSardegna conquista l’isola, in La Nuova Sardegna, 11 nadale 2021. URL consultadu su 9 santugaine 2022.
- ↑ (IT) Massimo Emanuelli, Tele Sardegna Nuoro, in MASSIMO EMANUELLI, 22 maju 2018. URL consultadu su 9 santugaine 2022.
- ↑ (IT) La protesta delle piccole tv: introvabili sul telecomando, in La Nuova Sardegna. URL consultadu su 9 santugaine 2022.
- ↑ 4.0 4.1 (IT) Chi Siamo, in TeleSardegna. URL consultadu su 9 santugaine 2022 (archiviadu dae s'url originale su 9 santugaine 2022).
- ↑ (IT) «Stiamo ottenendo grandissimi successi, abbiamo un futuro ricco di progetti», in La Nuova Sardegna, 11 nadale 2021. URL consultadu su 9 santugaine 2022.
- ↑ Telediariu, in www.telesardegna.net. URL consultadu su 9 santugaine 2022 (archiviadu dae s'url originale su 9 santugaine 2022).
- ↑ Telegiornale, in www.telesardegna.net. URL consultadu su 9 santugaine 2022 (archiviadu dae s'url originale su 9 santugaine 2022).
- ↑ Tg Lis [ligàmene interrùmpidu], in www.telesardegna.net. URL consultadu su 9 santugaine 2022.
Ligàmenes esternos
modìfica- Situ ufitziale, in www.telesardegna.net. URL consultadu su 9 santugaine 2022.