Temporada Cleopatra

Articulu in logudoresu

Cleopatra, o Ruven sicundu a s'Universidade Libera de Berlinu, est istada una temporada extratropicale chi at iscuttu male s'ala otzidentale de su Mare de Mesu in su mese de Sant'Andrìa de su 2013. Su sistema de pressione bassa at fattu a manera chi si fit isviluppadu unu muntone de temporadas, pro neghe de s'aera fritta chi, beninde dae nord, est intrada in su Mediterraneu fachende cuntattu cun s'aera caente chi benìat dae oriente.

Tzicrone Cleopatra: sa Sardigna si podet bìder in mesu.

Cunseguentzias

Su tzicrone nche at pesadu unu muntone de abba in Sardigna, battinde 440 mm de abba a manzanu de su 18 de Sant'Andrìa de su 2013; custu nche at fattu bessire dae cascia parìtzos rios, cund unu disaccattu chi at cajonàdu sa morte de nessi 18 persones, s'iscumparta de un'attera e sa destruidura de sos campos. Sos trettos chi sa temporada at corfidu prus male fin sa Gallura (supratottu Terranoa), sa Barbagia de Nugoro e s'Aristanesu. Su tzicrone at fattu dannu mannu fintzas in penisula italiana, mescamente in Calabria e Salentu, in ue una trumba de aera at corfidu su tzentru de Gallipoli, bogandeche domos e duas iscolas.