Zetone telefònigu
Articulu in logudoresu
Su zetone telefònigu est unu discu de metallu chi fiat impreadu una die pro pagare sas mutidas realizadas dae telèfonos pùbrigos. Sos zetones fiant comunos in Europa, Israele, Zapone e Amèriga de su Suddu. In sos Istados Unidos, fiant istados impreados finas a su 1944.
In Itàlia, sos primos isemprales de zetone fiant istados coniados in su 1927 dae bandas de sa Stipel, zestionadora de su servìtziu de telefonia in Peemonte e Lombardia, in s'ocasione de sa Fèria Mustrària de Milanu. Fiant in arpaga (un'aligadura de ràmene, nichèliu e tzincu) o in brunzu, e podiant esser impreados petzi dae sos telèfonos postos in intro de sa Fèria. In su 1.945, sa TETI aiat realizadu su primu zetone cun tres rallas, chi si podiat utilizare in cale si siat tipu de telèfonu pùbrigu. In su 1959, fiant nàschidos sos zetones impreados finas a su 31 de nadale de 2001, addaghi podiant galu ser tramunados in sas butegas 187 a balore de 9 zetones = 1 cartedda telefòniga, mancari zai no èsserent prus coniados dae su 1980. Sos bator dìzitos presentes suta de s'iscritura “zetone telefònigu” inditaiant s'annu e su mese de coniadura.
Su balore de su zetone fiat de 30 francos in su 1959, de 45 francos in su 1964, chi tando currespondiant a s'importu de 3 impursos telefònigu, a pustis de 50 francos in su 1972, de 100 francos in su 1980 e de 200 francos dae su 1984, sende adeguadu a sa bariadura de su costu e de sa dura de s'impursu telefònigu. In prus de custu, su zetone fiat impreadu frechentemente de moneda, belle chi non tènneret perunu balore ufissiale de coniadura de s'Istadu.
Cun sa cròmpida de sos telèfonos a monedas e s'ispainadura de sos aparitzos impreàbiles comente mèdiu de pagamentu pro sas arresonadas in puntos pùbrigos, su zetone nch'est essidu de produidura.