Agiudu:Grafias de Wikipedia

A dies de oe, sa limba sarda tenet grafias diferentes cun sas cales podet èssere iscrita. Esistint grafias ispetzìficas pro una variante, e nd'esistint unas cantas àteras chi si proponent de pòdere èssere aplicadas a cale si siat variante de su sardu. Sa chistione linguìstica sarda, difatis, no est ancora istada risòlvida, e duncas sa comunidade de sa Wikipedia sarda, analizende prus bortas sa situatzione, at deliberadu in manera democràtica (sighende sas lìnias ghia de Wikipedia, e duncas no in base a unu simpre nùmeru de votos ma in base a sos argumentos bàlidos chi ogni impitadore proponet) de permìtere s'iscritura de sos artìculos de Wikipedia sighende 4 grafias fundamentales: su campidanesu, su nugoresu, su logudoresu e sa LSC.

Iscritura de sos artìculos

Tue, comente impitadore, podes detzìdere ite grafia impreare. Ti pregamus de aplicare sas règulas grammaticales ligadas a sa grafia chi as isseberadu pro iscrìere s'artìculu: iscrìere in campidanesu masaprestu chi in nugoresu non signìficat a impreare unu limbàgiu pigadu dae su faeddadu o ligadu a su comunu tuo ebbia, ma signìficat connoschere sas normas gràficas pro impreare cussa grafia a intro de un'entziclopedia. Podes semper fàghere riferimentu a sos trastos chi Wikipedia ti ponet a disponimentu e consultare sos ditzionàrios chi podes agatare in custa pàgina. Pro iscrìere una pàgina in LSC podes fàghere riferimentu a su tradutore automàticu Apertium, ativadu a manera direta in Wikipedia (pro impitadores registrados), e/o fintzas impreare su curretore in lìnia de sa regione. Pro iscrìere in sas àteras variedades podes impreare s'àteru curretore in lìnia e sas àteras ainas de custa pàgina. Pro tènnere un'idea de comente ti cumportare cando ti ses acurtziende a Wikipedia, leghe·ti su tutorial (chi no est una ghia cumpleta, però). Si tenes dudas in subra de s'impreu de unu tèrmine chi in sardu (pensas) chi no esistat, controlla in totus sos ditzionàrios chi tenes a disponimentu e in sos trastos digitales, e si non chessis a agatare solutzione a su problema tuo, pedi agiudu a sa comunidade in su Tzilleri o in sa pàgina de sas cuntierras de s'artìculu chi ses iscriende.

DAE CARA: Su fatu chi ti siat permìtidu de iscrìere in sa variedade tua non cheret nàrrere chi ti nche depas ismentigare de sas règulas fundamentales de Wikipedia impreadas in totu su mundu. Sas boghes depent èssere de calidade e suportadas dae fontes e argumentos esternos, non bastat sa fide bona de sos impitadores pro giustificare un'artìculu.

Coesistèntzia de variantes diferentes

Petzi sas pàginas de artìculos podent èssere iscritas in grafias diferentes, ma non sas pàginas ispetziales. Permìtere sa coesistèntzia de 4 variantes de iscritura diversas ìmplicat chi carchi argumentu bèngiat tratadu prus de una borta (finas a 4). Custu non bolet nàrrere chi sa comunidade de Wikipedia bògiat promòvere dopiones pro ogni artìculu, ma si cheres lu podes fàghere.

Si ses iscriende una sèrie de artìculos a subra de un'argumentu dislindadu (pro esempru sa fìsica) e bisòngias de fàghere collegamentos intre pàginas de Wikipedia, isfruta sas pàginas chi esistint giai, fintzas si in variantes diversas de sas chi as impreadu tue, semper a patu chi sos artìculos siant iscritos bastante bene.

Templates

Pro identificare sos artìculos iscritos in sas grafias diferentes esistint duas genias de templates:

su chi identìficat sa pàgina primaria chi, faghende s'esèmpiu de sa LSC, si impreat cun sa sintassi {{LSC}}, e chi aparit gasi:

Custu artìculu est iscritu cun sa grafia

Limba Sarda Comuna

. Abbàida sas àteras bariedades gràficas:

campidanesu · logudoresu · nugoresu

su segundàriu chi si ponet in sas pàginas ligadas, iscriende {{Variant|LSC}} (inoghe podes pompiare sa ghia intrea) in su còdighe de mitza, e chi est gasi:

Artìculu in LSC

Si podet impreare fintzas in sas printzipales, si non bi nde sunt àteras versiones (s'artìculu est petzi in LSC, campidanesu, logudoresu o nugoresu) ma est mègius a impreare s'àteru ca permitit de gestire mègius sa cosa.

Sintassi de sos templates a disponimentu

Sos templates primàrios chi podes impreare sunt:

{{LSC}} pro iscrìere in LSC
{{CAM}} pro iscrìere in campidanesu
{{NUG}} pro iscrìere in nugoresu
{{LOG}} pro iscrìere in logudoresu

Sos templates segundàrios chi podes impreare sunt:

{{Variant|LSC}} pro iscrìere in LSC

{{Variant|CAM}} pro iscrìere in campidanesu
{{Variant|NUG}} pro iscrìere in nugoresu
{{Variant|LOG}} pro iscrìere in logudoresu

Critèrios de impreu

Su primu template si podet impreare isceti in sa pàgina chi prus de totus respetat sas lìnias de ghia fundamentales de Wikipedia:

Entziclopeditzidade

Puntu de vista neutrale
Amprura de s'artìculu
Fontes frunidas
Formatatzione

Annotamala si un'artìculu (in una cale si siat de sas variantes) est iscritu sena respetare sas normas ortogràficas de nissuna de sas variantes, perdet su deretu de èssere cunsideradu artìculu printzipale.

Sa de duas genias de template la si depet impreare in sas pàginas (non printzipales) iscritas cun sas àteras grafias.

Muda de una pàgina

Cando una pàgina est iscrita in una grafia non podes cambiare cussa grafia chene resone. Si una pàgina est iscrita in campidanesu, non faghet a sostituire sos tèrmines campidanesos, a esèmpiu, cun sos tèrmines nugoresos. Custu arresonu balet, craru, pro totu sas grafias. Custu gènere de mudas sunt permìtidas isceti pro pàginas chi sunt galu abbotzos, costituidas dae pagu rigas a beru, in ue s’ùrtima muda NON siat de pag'ora. In custu casu est inùtile a tènnere pàginas mortas, e si podet isseberare de las sostituire cun artìculos noos, bastat chi custos artìculos noos respetent sas lìnias ghia fundamentales de Wikipedia tzitadas in subra. Petzi sos amministradores tenent sos permissos pro burrare una pàgina.

Wikipedia funtzionat sighende sas règulas cumportamentales atzetadas in totu su mundu, de sas cales sa Wikipedia sarda no est esenta, e no est permìtidu unu cumportamentu chi no est tzivile e galu de mancu unu vandàlicu. Sos impitadores collàborant semper respetende·si a pare, e custu non depet cambiare.

Issèberu de sa pàgina primària

Comente si faghet a bogare sa prioridade a una pàgina e la dare a un’àtera pàgina de su matessi argumentu iscrita cun una àtera grafia? Si depent rispetare sos critèrios tzitados in subra, e sa pàgina chi si bolet pònnere comente primària depet èssere de calidade prus manna in manera crara. A paridade de amprura si cunsìderat sa pàgina cun su nùmeru prus mannu de fontes (elementu fundamentale de Wikipedia). A paridade de fontes, si un'artìculu tenet 50 rigas in prus, tocat a pònnere un'avisu in sa pàgina de sas cuntierras, dende sa possibilidade de megiorare sa chi in cussu momentu est sa versione printzipale intro de 5 dies. In casu contràriu sa prioridade si perdet e sa versione noa divenit cussa printzipale.

Unos àteros cunsideros

Semus cuntentos de t'àere intre sos impitadores ativos de Wikipedia, e semus seguros chi as a cumprèndere sa punna de custa pàgina de agiudu. Semus totus faghende su màssimu pro evitare cale si siat gherra interna a Wikipedia chi diat fàghere dannu galu de prus a sa limba nostra, male tratada pro sèculos. Si boles dare su contributu tuo, fintzas pro su chi pertocat a custu chi as lèghidu, lu podes fàghere, ma ammenta·ti semper de lu fàghere partende dae su presupostu chi su chi sos impitadores sunt chirchende de otènnere cun su progetu de Wikipedia est sa subravivèntzia de sa limba, subra ogni partzidura territoriale, e custa est sa cosa prus importante. Si boles contribuire ammenta·ti chi t'agatas a intro de un'entziclopedia: faghe·lu batende argumentos, e non sentimentos.