Bandera berbera

Articulu in nugoresu

Sa bandera berbera (in berberu: ⴰⵛⵏⵢⴰⵍ ⴰⵎⴰⵣⵉⵖ, Acnyal Amaziɣ) est sa bandera de sos bèrberos, chi sunt su populu primu de s'Africa de susu.

Bandera berbera

In su 1970, s'Accademia Berbera at naratu de ponner sa prima bandera berbera chi aìat imbentatu su militante Mohand-Aârav Bessaoud.

In su 1998, sa Cunferentzia Mondiale Amazigh at fatu sa bandera ufitziale in Tafira, in sas isulas de Las Palmas (isulas Canarias), isulas in ube istabant sos Guancios, unu populu berberu anticu.

Sa bandera si cumponet de tres colores: turchinu, birde e grogu a bandas orizontales de sa propiu artesa, e una lìtera de tifinagh Yaz o AZA.

Cada colore si riferit a unu elementu de Tamazgha, tretu berberu dae s'anticoriu:

• Su turchinu rapresentat su Mare de Mesu e s'otzeanu atlanticu;
• su birde rapresentat su bled, chi est su sartu chi si podet ponner a curtibu e sas muntagnas birdes;
• su grogu rapresentat s'arena de su desertu de su Sahara.

Sa lìtera Z de s'arfabetu tifinagh in colore ruju est a indittare totu sos chi sunt falatos gherrande pro su reconnoschimentu de sa limba e curtura berbera, in prus est su simbulu de sa resistentzia e de sa bida.