Bangui

Artìculu in LSC

Bangui est una tzitade de 734.350 bividores (istima de s'annu 2012), capitale e tzitade printzipale de sa Repùblica Tzentrafricana. Situada a s'oru de s'Ubangui, afluente de su Congo, a curtzu de una sèrie de istrumpos chi lìmitant su trasportu de is produtos cummertziales, si pesat a in antis de sa tzitade congolesa de Zongo, a s'oru opostu de su frùmene, chi format sa frontera intre sa Repùblica Tzentrafricana e sa Repùblica Democràtica de su Congo.

Bangui

Posidura in sa Repùblica Tzentrafricana

Bangui fiat fundada in su 1889, che a tzentru amministrativu de s'Artu Ubangui, a fatu mentovadu Ubangui-Chari, a s'antiga Àfrica Ecuatoriale Frantzesa e in su 1958 fiat fata capitale de sa Repùblica Tzentrafricana. Est istada testimòngia de sos abbolotos de su martzu 1981 pro depònnere su ditadore Jean-Bedel Bokassa, chi tando si fiat autoproclamadu imperadore. Est istadu iscenàriu de amotinamentos, rebellias e corpos de istadu vàrios, pro custu si cunsìderat una de is tzitades prus inseguras de Àfrica.

Su tzentru de sa tzitade est a curtzu de su frùmene e si nde distinghent unu arcu de triunfu mannu dedicadu a Bokassa, su Palatzu Presidentziale, su Museu Boganda e su mercadu tzentrale. S'àrea residentziale, cummertziale e prus animada currespondet a su bighinadu mentovadu km 5, situadu a chimbe chilòmetros a norte de su tzentru urbanu.

Is indùstrias printzipales de sa tzitade si dèdicant a fraigare tessìngios, produtos alimentares, birra, caltzaduras e sabone. Esportat massimamente cotone, linna, cafè e fògia de isprene. Tenet aeroportu internatzionale e est sea de s'Universidade de Bangui, fundada su 1970.