Crèsia de Sant'Uanni de Sinnis

Artìculu in LSC

Sa crèsia de Sant'Uanni de Sinnis est unu fabbricu religiosu chi istat in su burgu omònimu de sa penìsula de Sinnis, apendìtziu de su comunu de Crabas, in sa provìntzia de Aristanis.

Fatzada de sa crèsia de Sant'Uanni de Sinnis

S'agatat in s'istrada chi in epoca romana acapiaiat sa bidda de Tharros a sa de Cornus, chi dd'istaiat pagu a tesu, in su Montiferru.

Est unu de is monumentos cristianos prus antigos de Sardigna.

Istòria

Sa crèsia fiat pesada in su logu in ue s'agataiat una necròpoli, giai istada pùnica e a pustis cristiana.

Su primu acontzu est de metade de su sèculu VI p.C. ma est istada ammanniada intre is de 9 e de 10 sèculos.

In die de oe sighit a tènnere caraterìsticas de època artu mediavale.

Descritzione

Navada tzentrale de sa crèsia

Sa cresia est dedicada a Santu Giuanne Batista.

Tenet pranta retangulare e àbside chi andat a s'esternu e mirat a Est. Est fata cun brocos de arenàrgiu chi sunt istados pigados de is muros de sa bidda Tharros, chi ddi istat a curtzu e chi in s'Edade Mèdia fiat giai istada abandonada pro ite non segura de is lòmpidas chi arribaiant de su mare.

Sa parte de intro est ordingiada in tres navadas isceradas de tres arcos in sighidu e ammantadas cun bòvidas a carrada. In subra, a sa rughera de sa navada tzentrale cun su transetu s'agatat unu tzimbòriu.

Sa lughe intrat de una bentana otagonale chi s'agatat in s'addeinanti e de duas bìforas in s'àbside chi ammentuant modellos de àteras de sa Lombardia o de Ravenna.

De seguru, in antis de is traballos de su de 9 sèculos sa crèsia teniat istrutura a pranta tzentrale bizantina, cun bator bratzos de paris longària e unu tzimbòriu, comente sa basìlica de Santu Sadurru in Casteddu, chi est de su matessi perìodu.

Is àteras duas navadas a costàgiu sunt duncas unu acontzu afatanti.