Istassione ferruviària de Macumere

S'istassione ferruviària de Macumere est s'istassione de sos CFN in sa comuna de Macumere.

Caraterìstigas

S'istassione, fraigada in sa Dossale Sarda, disponet de tres bias impreadas pro su servìtziu de passizeris, chi duas si podent sizire a mèdiu de unu sutacoladorzu, e bias annanghedoras de servìtziu. Est presente finas unu transitadorzu de mercantzias e una filera de bias pro custa casta de servìtziu.

In su tempus coladu, s'istassione disponiat de una filera de bias de ladària minimada, oe ismanteddada pro acollozire su sutacoladorzu pionale, e sas bias naradas fiant cunetadas cun su transitadorzu probianu de sos CFdS de tando peri un'aunidorzu remoidu in su 2.006. In particulare, una de custas bias terminaiat a faca de sa bia 1, cun sa cale cumpartziat s'apeadorzu serente su fraigu de biazadores, e fiat impreada in su tempus coladu pro s'intertràmunu intre sos trenos de CFN e CFdS. Una bia annanghedora presentaiat sa peculiaridade de tenner ambas ladàrias, chi belle gasi s'agataiant in duos livellos diferentes de profundidade, pro permiter s'insertadura de sos carriteddos adatadores “Langbein” a sos carros CFN. Custos ùrtimos arribaiant a sas roderas de ladària comuna de sa bia, postas a livellu de sa superfìtzie, e fiant cullocados a subra de sos carriteddos, chi una bia imbragados intraiant in cuntatu cun sa rodera de zosso permitende-li de intrare a sa retza CFdS e de poder esser trasportados chirru a Nùgoro e Bosa.

Dae su puntu de bista de su moimentu, sa zestione acontessit in situ pro diferentes oras de sa die, cando ch'in s'ausèntzia de s'aderetadore de moimentu logale, sas installaduras de s'istassione sunt zestionadas a sa remota dae s'A.TZ.O. de Casteddu.

Intertràmunos

S'istassione est sizida dae sas cumponiduras de Trenitalia chi tenent comente destinu Casteddu, Terranoa, Aristanis, Figari, Chilivane, Tàtari e Portu Turre.

Dae s'istassione ferruviària probiana de sa retza de ladària minimada, zestionada dae s'IRST dae su 2.010 e situada in s'àteru chirru de pratza Duas Istassiones, in prus de custu, est possìbile a nche sizire Nùgoro cun trenos operados dae sa sotziedade de trasportos de sa Rezione. Mancari sos rodados de sos CFdS antigos no intrent prus a su transitadorzu CFN, sos oràrios de unos cantos trenos de s'IRST sunt postos in currespondèntzia cun sos de Trenitalia, permitende de mantenner, belle chi minimada, s'intermodalidade intre sos duos trasportadores ferruviàrios. S'IRST, in sas probianias de su transitadorzu, tenet s'istassione de sos postales sua pròpia, dae ue si podent sizire logalidades bariadas de su zirile. In prus de custu, s'IRST dispensat finas unu servìtziu urbanu. Su transitadorzu tenet relassione cun s'abioportu de S'Alighera-Fertìlia a mèdiu de sas lìnias postalencas Depranu.