Kilt

Articulu in nugoresu

Su kilt est una bestimenta traditzionale, tipica de s'omine in Iscotzia, chi est unu pannu de istoffa fattu cordulare peri su chintu e postu indossu, a manera femenina. In anticorju, su kilt (o, nessi, babbu suo) fit una manta de istoffa longa bastante pro si la ponner a palas, a pustis de la aer cordulada peri su chintu.

Kilt.

Orizine

Su kilt, comente si connoschet commo, est unu imbentu de Thomas Rawlinson, unu imprendidore inglesu de su '700 chi, disterrande in sas Highlands e imparande sa curtura de cussa terra, aìat promòghiu una assione cummertziale manna imbentande una traditzione. In sos primos annos de su Settichentos (tra su 1727 e su 1734), pompiande a sos obreris chi nde fachian rugher sos arbures pro dare linna a sa furrache sua de Inverness, aìat pessau de facher prus simpre sa bistimenta, pro chi seret prus pacu imbarratzadora. Sa zente prus povera tenìat difattis una manta longa de istoffa, comporada a istraccu barattu, chi coperìat tottu sa carena e chi bolìat istrinta a chintu, fachende gòi un'ispetzia de fardetta. Fit tando chi Rawlinson imbentéit sa fardetta tipica iscotzesa: pro custa resone, su kilt si depet tenner in cussideru comente una bistimenta fatta de pac'ora, chi su movimentu romanticu at impostu comente sìnzu berdaderu de anticorja gaelica. Fit in imprèu fintzas pro distingher una familia dae un'attera.

Mancari chi, oje in die, in su mundu otzidentale sa fardetta siat bistimenta femenina, in passau non fit goi, assumancu dae sos anticos romanos.

Su kilt in Iscotzia

Su kilt si assotziat oje a sa bistimenta traditzionale de sas Highlands iscotzesas, in ube si fachet in tartan e si ponet impare a unu sporran, est a narrer una bertula de corju impreada pro bi tenner dinare. Si impreat comente bistimenta tzerimoniale.