Prince of Persia 2: The Shadow and the Flame

Articulu in nugoresu

Su printzipe de Persia 2: S'Umbra e sa Framma (Prince of Persia 2: The Shadow and the Flame in limba orizinale) est unu videojocu platform chi Brøderbund aiat prubicau in su 1993. Est su sichidore ufitziale de su primu capitulu, e su printzipe, pro more de una maghìa de Jaffar, a pustis de unu isposònzu addurau ùndichi dies est custrintu a che torrare in esìliu ind un'isula misconnotta. In su biazu chi at a fachere, peròe, at a iscopèrrere fintzas sa regale identitade sua...

Gameplay

Sas diferentzias abberu de importu sun sa possibilidade de sarvare sa partita in deche slot e su limite de tempus chi su jocu imponet pro lu acabbare (75 minutos imbetzes de un'ora ebìa). De annotare fintzas su fattu chi b'at trapolas novas e sos inimicos, chi poden essere prus de unu in s'ischermu, sichin su printzipe brincande fintzas sos trèmenes che a issu, si provat solu a si che fughìre. Sa fase de pelea si intendet meda de prus e est belle un'òbricu a buffare cantas prus potziones si podat, pro bi la fachere.