Saint Martin (ìsula)

Artìculu in LSC

Saint Martin (in frantzesu Saint-Martin, in olandesu Sint Maarten) est un'ìsula tropicale de sas Antillas Minores posta in sos Caràibes nord-orientales, intre sas ìsulas de Ambidda in su norte, Saint-Barthélemy in su sud-estu e Saba e Sint Eustatius in su sud. S'ìsula, de 87 km², est partzida in duas metades intre Frantza e Regnu de sos Paisos Bàscios.

Bista satellitare de s'ìsula

Mapa de s'ìsula

Sa parte setentrionale costituit sa colletividade de Saint-Martin (Collectivité de Sant-Martin), chi est una colletividade ultramarina de Frantza. Sa parte meridionale costituit Sint Maarten, unu de sos paisos costituentes de su Regnu de sos Paisos Bàscios.

Totu imparis, in àmbitu internatzionale sos duos territòrios si connoschent che "Saint-Martin / Sint Maarten". A bias pro si refèrrere a s'ìsula s'impreat puru sa sigla SXM, s'identificadore chi impreat s'IATA pro s'Aeroportu Internatzionale Printzesa Juliana, su printzipale de s'ìsula.

Sas tzitades printzipales sunt Philipsburg, a banda olandesa, e Marigot, a sa frantzesa. Sa populatzione est de unos 71.000 bividores, divididos si aprossimadamente metade e metade pro cada chirru. S'ìsula est visitada dae una mèdia de unu millione de turistas pro annu.

Iscoberta durante segundu viàgiu de Columbu a su Mundu Nou su 11 de santandria de su 1493, die de Santu Martine de Tours, cun su nùmene de su cale dd'aiat batiada. A pustis de diversas cuntierras pro su cuntrollu de sas salinas intre ispagnolos, olandesos e frantzesos, su 23 de martzu de su 1648 s'est signadu su Tratadu de Cuncòrdia intre sas duas potèntzias chi galu ocupaiant s'ìsula, su regnu de Frantza e su de sos Paisos Bàscios, chi aiant cuncordadu de si partzire in partes uguales su territòriu de s'ìsula.