Sana'a

Artìculu in LSC

Sana'a (in àrabu صنعاء, Ṣan‘ā’) cun una populatzione de unos 1.937.451 bividores (2012), est sa capitale e sa tzitade printzipale de su Jemen. Est posta a 2.350 metros de artària; posta istrategicamente in su caminu intre Aden e Sa Meca, est su tzentru de una regione vitícola. Su tzentru antigu de Sana'a est iscritu dae su 1986 in sa lista de su patrimàniu de s'Umanidade, e in sa lista de su Patrimoniu de s'Umanidade in perìgulu dae su 2015.

Bista

Posidura in su Jemen

La budda min Şan‘ā’ ('Sanà cheret bista') sunt sas famosas paràulas atribuidas a s'imam Muhammad ibn Idris al-Shafi'i (768-820), chi aiat bisitadu s'antiga capitale diversas bortas. Comente issu, medas biagiadores de s'antigidade fiant abarrados impressionados dae sa bellesa de Sana'a. Su geògrafu e istòricu famadu jemenita Al-Hamdanì si si fiat maravilliadu de sa bellesa de sa tzitade, e su biagiadore persianu Ibn Rusta, cuntemporàneu suo, nd'aiat apretziadu mescamente su màndigu. Sa tzitade betza de Sana'a est cunsiderada su museu a s'abertu prus mannu de su mundu, e est istada decrarada Patrimoniu Mundiale de s'Umanidade pro s'UNESCO in su 1986: cuntenet prus de chentu moscheas, dòighi hammams e 6.500 domos de architetura ispetziale meda, cun turres de apartamentos, totu paris fraigadu in antis dae su de 11 sèculos. S'iscerant puru sa fortilesa de Qasr as-Silah e su mercadu de Bab al-Yaman. Sa tzitade de Sanà est unu tzentru culturale musulmanu, cun un'universidade islàmica e diversas moscheas e iscolas corànicas.