Wikipedia

Ecce Homo (Martínez-Giménez)

Custu artìculu est iscritu cun sa grafia Limba Sarda Comuna. Abbàida sas àteras bariedades gràficas:

campidanesu · logudoresu · nugoresu

S'Ecce Homo est una pintura murale de Elías García Martínez[1], artista minore ispanniolu[2]. S'òpera s'agatat in su Santuàriu de Misericòrdia de Borja, in Ispànnia.

Sa pintura, in antis de su degradu de su tempus e de s'interventu de sa Giménez

Sa pintura, cunsiderada de importu artìsticu modestu, est lòmpida a fama mundiale pro unu restàuru amatoriale male resèssidu de su 2012.[3][4][5]

Istòria modìfica

S'artista modìfica

Elías García Martínez (Requena, 1858 - Utiel, 1934) est istadu unu pintore e professore de arte ispanniolu.[6] Martínez aiat comintzadu sa carriera artìstica sua in sa tzitade nadale, istudiende posca in s'Acadèmia de Bellas Artes de Valèntzia e in Bartzellona. Dae su 1894 at traballadu in Zaragoza pro sa Provincial de Bellas Artes de Zaragoza, in ue at tentu cursos de pintura ornamentale e ritratìstica finas a su 1929.

Martínez est cunsideradu un'artista minore dae sa crìtica ispetzializada: in unos cantos casos, is traballos suos comente a ritratista sunt cunsiderados discretos, traditzionales meda e privos de innovatzione; meda de sa produtzione artìstica de Martínez cunsistiat in còpias de òperas de arte antigas.[6]

Istòria de s'òpera modìfica

S'artista aiat donadu s'òpera a sa tzitade de Borja, in ue passaiat is vacàntzias, a pustis de dd'àere pintada in duas oras a subra de una colunna a manca de s'altare de su Santuàriu de Misericòrdia. Su sugetu est ispiradu dae una pintura a ògiu de s'artista italianu Guido Renes, e dae un'intzisione, sìmile meda, de William French.[1] In prus de chentu annos, s'òpera non fiat mai istada restaurada, e s'agataiat in un'istadu de degradu avantzadu, cun partes mannas de intònicu iscorgioladu e colores isarbolidos meda. Is nebodes de García Martínez, residentes in Zaragoza, connoschiant is cunditziones de sa pintura e fiant comintzende a chircare fundos pro unu restàuru cumpletu.[7]

Su restàuru modìfica

In s'austu 2012 Cecilia Giménez, parrochiana de 81 annos, pintora amantiosa sena esperièntzia nen cualìfica in restàuru, pigat s'initziativa boluntària de pònnere manu a sa pintura, arruinende·dda in manera sèria.[8] Sa noa de s'acontèssida apareit sa prima borta su 7 austu, publicada in unu blog ispanniolu chi creiat s'afriscu vìtima de un'atu de vandalismu.[1] Su 21 de su matessi mese su cuotidianu Heraldo de Aragón at iscobertu e at isveladu s'autora de s'interventu. Dae in cue sa noa est arribbada a is cuotidianos majores ispanniolos, faghende s'òpera e su restàuru suo famados in totu su mundu.[1]

Is mèdios de comunicatzione de totu su mundu dd'ant definidu su peus restàuru de s'istòria.[7][9][10][11] Sa sennora s'est amparada narende de àere pigadu s'initziativa ca non boliat prus bìdere sa pintura in cussas cunditziones, e de àere tentu su permissu de su pàrracu; custu ùrtimu at negadu de àere permìtidu a sa fèmina de pònnere manu a sa pintura: sa parrochiana, duncas, diat àere agidu de lìbera initziativa sua.[12][13]

S'assessore a sa cultura de Borja at decraradu chi «si no est recuperàbile, at a èssere ammantadu cun una fotografia de sa pintura originale».[14] Is erederis de García Martínez ant espressadu s'intentzione de intentare unu restàuru, mancari sende intzertos chi s'òpera potzat torrare a is cunditziones originales; nointames, ddoe at opositziones mannas a su riprìstinu, ca sa fama sua at giutu a unu boom de turismu in sa bidda, cun intradas mannas a is càscias comunales.[15][15] In tempus pagu meda, sa pintura arruinada est essida atratzione turìstica, bona a atràere flussos de bisitadores incuriosidos dae su fenòmenu mediàticu, chi pagant unu billete pro bìdere s'òpera. Est in prus comintzadu unu cummèrtziu ricu de ammentos e ogetos de merchandising a subra de s'òpera.[16][17]

Cecilia Giménez at pedidu e otentu is deretos de autore de s'òpera, paris a su 49% de su profetu de is bìsitas.[18][19] Sa fèmina at decraradu chi su balàngiu ant a andare a sa chirca pro s'atrofia musculare, maladia chi nde sufrit su fìgiu, mentras su 51% chi abarrat at a èssere donadu a una fundatzione de benefitzèntzia pro s'assistu de is sèneghes.[20][21] In s'ìnteri, sa Giménez at aprofitadu de sa fama improvisa pro bèndere in eBay unas cantas pinturas suas.[22]

Fenòmenu de Internet, artìsticu e culturale modìfica

Is retes sotziales ant agiudadu meda a portare s'òpera a lestru a sa fama: in Facebook e Twitter sunt nàschidos, in pagu tempus, grupos e pàginas dedicadas a s'òpera e a sa restauradora "sua".[8] In sa pàgina Twitter est nàschidu su nomìngiu de s'òpera isempiada: Ecce Mono (Ecu sa martinica). Àteros nomìngios sunt: Ecce bombo, Potato Jesus, Monkey Jesus, Beast Jesus, Hedgehog Jesus. Un'imbiadu de sa BBC at iscritu chi assimìgiat a su «disinnu a pastellu de una martinica piluda meda, bestida cun una tùnica»[7][13], su Daily Mail ddu paragonat a unu personàgiu de Planet of the Apes (Su praneta de is martinicas)[23], pro àteros assimìgiat a un'eritzu (dae in ue, su nomìngiu hedgehog).[24]

S'acuntessimentu est istadu paragonadu fintzas a sa trama de su film Bean: The Ultimate Disaster Movie[25][26], cun riferimentu a s'iscena de s'isciùsciu, e de su "restàuru", de su retàulu de James Whistler.[27] Àteru eventu de ammentare est Cecilia Prize, cuncursu satìricu de arte in ue faghiat a "restaurare" e espònnere sa versione digitale pròpia de Ecce Homo pro bìnchere su prèmiu Cecilia. S'artista Roberto Baserga est autore de una còpia possìbile de s'òpera ruinada[1].

In su 2013 su drammaturgu argentinu Rafael Spregelburd at pigadu a iscòticu su restàuru faddidu de s'Ecce Homo, pro isvilupare riflessiones a subra de sa fine de s'arte in s'òpera teatrale Furia avicola.[28]

Crìtica artìstica modìfica

Sa crìtica ispetzializada at interpretadu s'òpera comente a una fusione de temas sacros e seculares; unu cummentadore de sa rivista Forbes at definidu su restàuru male fatu comente a «sa rapresentatzione incumprèndida, a banda de una simpre sennora, de su sarvadore suo», mentras unu giornalista de su Guardian at definidu sa Giménez una «artista iconoclasta chi at trasformadu un'òpera de perunu balore in unu capolavoru».[29][30] In Change.org est istada fata una petitzione, firmada dae prus de 20.000 persones, pro mantènnere sa pintura in s'istadu atuale, definidu «una riflessione a subra de sa polìtica e sa sotziedade de su tempus nostru e una crìtica a is teorias creatzionistas».[31]

Su grupu artìsticu ispagnolu Wallpeople at dedicadu una galleria de tributos artìsticos a s'òpera, afirmende chi sa Giménez at creadu un'icona pop.[32] Sa tendèntzia boom de s'isfrègiu in crae irònica de pintados famados est istada paragonada a unu movimentu artìsticu in nàschida, chi is mèdios de comunicatzione ddi narant Istile Giménez.[33][34]

Riferimentos modìfica

  1. ↑ 1.0 1.1 1.2 1.3 Un restauro un po’ così, Il Post, 25 agosto 2012. URL consultadu su 5 novembre 2013.
  2. ↑ Un hecho incalificable, cesbor.blogspot.com.es, 7 agosto 2012. URL consultadu su 22 ottobre 2014.
  3. ↑ Rocío Huerta, La restauración de un 'Ecce homo' se convierte en un sainete mundial, in cultura.elpais.com, 22 agosto 2012. URL consultadu su 24 agosto 2012.
  4. ↑ Elderly woman destroys 19th-century Spanish fresco by Elias Garcia Martinez in botched restoration, independent.co.uk, 22 agosto 2012. URL consultadu su 24 agosto 2012.
  5. ↑ Great art needs a few restoration disasters, in guardian.co.uk, 23 agosto 2012. URL consultadu su 1º settembre 2012.
  6. ↑ 6.0 6.1 García Condoy, los, enciclopedia-aragonesa.com, 29 novembre 2010. URL consultadu su 22 ottobre 2014 (archiviadu dae s'url originale su 12 austu 2018).
  7. ↑ 7.0 7.1 7.2 Raphael Minder, Despite Good Intentions, a Fresco in Spain Is Ruined, The New York Times, 23 agosto 2012. URL consultadu su 5 novembre 2013.
  8. ↑ 8.0 8.1 Cecilia Gimenez, la restauratrice peggiore del mondo, impazza sul web, affaritaliani.it, 5 settembre 2012. URL consultadu su 5 novembre 2013 (archiviadu dae s'url originale su 1º abrile 2023).
  9. ↑ Nick Carbone, Worst. Restoration. Ever. Elderly Woman Botches Touch-Up Job on 19th Century Church Fresco, Time NewsFeed, 23 agosto 2012. URL consultadu su 5 novembre 2013.
  10. ↑ Esther Inglis-Arkell, The Worst Art Restoration Mistakes of All Time, io9.com, 28 agosto 2012. URL consultadu su 5 novembre 2013.
  11. ↑ History's Worst Restoration: 80-Year-Old Woman Defends Work On Century-Old Jesus Mural, worldcrunch.com, 23 agosto 2012. URL consultadu su 5 novembre 2013 (archiviadu dae s'url originale su 15 santugaine 2016).
  12. ↑ Filomena Porcopio, Anziana restaura affresco di Gesù: ora è uno scempio, ultimenotizieflash.com, 25 agosto 2012. URL consultadu su 5 novembre 2013 (archiviadu dae s'url originale su 5 santandria 2013).
  13. ↑ 13.0 13.1 Spanish fresco restoration botched by amateur, bbc.com, 23 agosto 2012. URL consultadu su 22 ottobre 2014.
  14. ↑ David Randall, Megan Tatum, Botched Art Is an Online Sensation, The Independent, 26 agosto 2012. URL consultadu su 5 novembre 2013 (archiviadu dae s'url originale su 21 cabudanni 2013).
  15. ↑ 15.0 15.1 Sara Rania, Ecce homo sfigurato, a Cecilia Gimenez una parte dei diritti d'autore, artsblog.it, 21 agosto 2013. URL consultadu su 5 novembre 2013 (archiviadu dae s'url originale su 23 austu 2017).
  16. ↑ Quando un affresco rovinato si trasforma in attrazione turistica, liligo.it, 29 agosto 2012. URL consultadu su 5 novembre 2013 (archiviadu dae s'url originale su 5 santandria 2013).
  17. ↑ (ES, EN)   RuptlyTV, Spain: Meet the woman who turned Jesus into a monkey, in YouTube.
  18. ↑ Ha “restaurato” l’Ecce Homo di Martinez: Cecilia Gimenez vuole diritti d’autore, blitzquotidiano.it, 21 settembre 2012. URL consultadu su 5 novembre 2013.
  19. ↑ Ecce Homo: Cecilia Gimenez riceverà i diritti d’immagine del Cristo di Borja, darlin.it, 22 agosto 2013. URL consultadu su 5 novembre 2013.
  20. ↑ Ecce Homo 'restorer' wants a slice of the royalties, theguardian.com, 22 settembre 2012. URL consultadu su 22 ottobre 2014.
  21. ↑ La saga dell’Ecce Homo. È sempre più un caso il restauro che ha sfigurato un affresco in Spagna: 40mila visitatori, e oltre 50mila euro raccolti per beneficenza, arttribune.com. URL consultadu su 22 ottobre 2014.
  22. ↑ Cecilia Giménez, l'autrice del peggior restauro della storia mette in vendita una sua opera su ebay, artsblog.it, 14 dicembre 2012. URL consultadu su 22 ottobre 2014 (archiviadu dae s'url originale su 20 trìulas 2016).
  23. ↑ A fading fresco and a DIY fiasco: Masterpiece of Jesus is destroyed after old lady's attempt to restore damage is a less-than-divine intervention, Daily Mail, 22-25 agosto 2012. URL consultadu su 5 novembre 2013.
  24. ↑ Sam Jones, Spanish church mural ruined by well-intentioned restorer, The Guardian, 22 agosto 2012. URL consultadu su 5 novembre 2013.
  25. ↑ Church masterpiece 'restored' as Mr. Bean would do it, CNN, 23 agosto 2012. URL consultadu su 5 novembre 2013 (archiviadu dae s'url originale su 1º abrile 2023).
  26. ↑ Alex Santoso, Life Imitates Mr. Bean: Amateur "Restoration" of 100-Year-Old Fresco, neatorama.com, 22 agosto 2012. URL consultadu su 5 novembre 2013.
  27. ↑   movieclips, Bean (9/12) Movie CLIP - Staining Whistler's Mother (1997) HD, in YouTube.
  28. ↑ Massimo Marino, Le apocalissi di Spregelburd (PDF), in Doppiozero, 6 febbraio 2014. URL consultadu su 22 dicembre 2014.
  29. ↑ Why Every Church Should Be Blessed With A Muralist As Uncouth As Cecilia Gimenez, forbes.com, 27 settembre 2012. URL consultadu su 22 ottobre 2014.
  30. ↑ Great art needs a few restoration disasters, theguardian.com, 23 agosto 2012. URL consultadu su 22 ottobre 2014.
  31. ↑ Mantenimiento de la nueva versión del Ecce Homo de Borja, change.org. URL consultadu su 22 ottobre 2014.
  32. ↑ Wallpeople homenaje al ‘Ecce Homo’. 2012, wallpeople.org. URL consultadu su 5 novembre 2013.
  33. ↑ Arte: sul web boom di restauri fallimentari, nasce lo 'stile Gimenez', Adnkronos, 30 agosto 2012. URL consultadu su 5 novembre 2013 (archiviadu dae s'url originale su 7 santugaine 2014).
  34. ↑ Miriam Leto, Boom di restauri fallimentari sul web, nasce lo stile Gimenez, artsblog.it, 30 agosto 2012. URL consultadu su 5 novembre 2013 (archiviadu dae s'url originale su 12 cabudanni 2017).

Ligòngios esternos modìfica


 
Wikimedaglia
Custu est unu de sos artìculos de su mese, est a nàrrere unu de sos mègius artìculos creados e postos in sa pàgina printzipale dae sa comunidade, chi l'at isseberadu pro su mese de maju de su 2023

Candidados pro sos meses benidores

Totu sos artìculos de su mese

Bogadu dae "https://sc.wikipedia.org/w/index.php?title=Ecce_Homo_(Martínez-Giménez)&oldid=183378"