Faso

Custu artìculu est iscritu cun sa grafia Limba Sarda Comuna. Abbàida sas àteras bariedades gràficas:

campidanesu · logudoresu · nugoresu

Faso, pseudònimu de Nicola Fasani (Milano, 7 aprile 1965), est unu bassista italianu.

Faso
Informatziones
Nùmene de nàschida	Nicola Fasani
Nàschidu su	07 de abrile de su 1965 Milanu, Lombardia, Itàlia
Gènere musicale	Rock dementziale Rock progressivu Pop rock Fusion Funk
Ocupatziones	sonadore, dopiadore, presentadore radiofònicu, giogadore de baseball
Istrumentos	bassu, bateria, chiterra
Annos de atividade	1986 - oe
Artistas assotziados	Elio e le Storie Tese Elio (cantadore) Rocco Tanica Cesareo Meyer Jantoman Trio Bobo Biba Band The Phazees Tenores de Neunele Rossana Casale Mina Franco Battiato Franco Fasano Eugenio Finardi Sergio Caputo Daniele Silvestri

Faina musicale

Sos zistros de sos Èlios

Comente cada membru de sos Elio e le Storie Tese, in su cursu de sos annos Faso at adotadu, in manera prus o mancu estemporànea, medas zistros. Intre custos: "Pranzo", "Niki", "Bassista Nick", "Nicola Ronconi", "Fasacci", "Pasto". Su paranùmene Pasto benit dae una faddina de unu giornalista chi aiat isballiadu a iscrìere su zistru suo de su tempus ("Pranzo") publichende un'intervista. Ma Faso aiat pessadu chi custu alias podiat sonare comente unu diminutivu unu pagu presumidu de su sambenadu de Jaco Pastorius, bassista legendàriu de su cale issu est fan, e pro custa resone l'aiat mudadu in Faso.

Faso est su bassista de sos grupos musicales Elio e le Storie Tese, Trio Bobo e Biba Band. At fintzas fatu parte de sa banda The Phazees pro carchi trasmissione televisiva de MTV.At collaboradu, intre sos àteros, cun Rossana Casale, Mina, Franco Battiato, Franco Fasano, Eugenio Finardi, Sergio Caputo, Daniele Silvestri.

Pro custu ùrtimu at sonadu totu sos petzos de s'album Daniele Silvestri (francu L'uomo intero e Il Flamenco della doccia) e sos branos L'uomo col megafono, Le cose in comune, Prima di essere un uomo e Marzo 3039 de s'album Prima di essere un uomo. Sonat fintzas in sas cantzones Salirò, Sempre di domenica e Manifesto de s'album Unò-dué. In s'album Bau de Mina (2006), Faso sonat su bassu in sete branos: Johnny scarpe gialle, Nessun altro mai, Alibi, Un uomo che mi ama, L'amore viene e se ne va, Fai la tua vita e Inevitabile.

In s'istiu de su 1992 at connotu sos cantadores de su Tenore de Neunele, e at collaboradu (in paris cun Elio, Jantoman, Christian Meyer e Vittorio Cosma, totus àteros membros de Elio e le Storie Tese) a su discu Terra Nostra de su 1996, in ue at sonadu, in paris cun Christian Meyer e Vittorio Cosma, in sos branos Amazzonia e Sa Sienda.

Istile

Comente totu sos cumponentes de Elio e le Storie Tese, fintzas Faso est unu mùsicu caraterizadu dae capatzidades tècnicas e cumpetèntzias musicales mannas. In s'istile suo s'agatant medas caraterìsticas de su funky, de su jazz e de sa fusion, ma Faso ammustrat fintzas una capatzidade manna de adatare sas lìnias rìtmicas suas a branos rock and roll, disco music e pop. Una de sas tècnicas prus impreadas est cussa de su slap, cun sa cale a s'ispissu Faso acumpàngiat sos petzos prus ritmados. Unìàtera particularidade de Faso cunsistet in su pitzigare sas cordas a cusrtzu de su mànicu de su bassu: gasi, s'atacu issoro resurtat prus delicadu e lis cunferit una dinàmica chi torrat su sonu prètzisu issoro a cuddu realizadu in unu bassu fretless.

Faso durante sa sèrie de cuntzertos Emozioni fortissime (14 trìulas 2007, Cesenatico)

In sos branos de sos Èlios sos assolos de bassu non cumparent praticamente mai, fintzas si in carchi cantzone Faso esecutet patterns rìtmicos cun cumponentes fortes de improvisatzione (comente càpitat in sas istrofas de Supergiovane o Servi della Gleba) o fintzas in setziones minores comente a s'intro de El Pube, in ue su bassu sonat a s'otava cun su flàutu traessu. Faso realizat unìassolu beru e pròpiu in su branu Mio Cuggino in ue s'impreu de discansos musicales piessignos li cunferit sonidos pretamente jazìsticos.

Trastes

Intre sos medas bassos chi fàghent parte de sa colletzione sua de trastes, su chi l'agradat de prus est unu Yamaha TRB6P a ses cordas, chi est cussu impreadu in totus sas esibitziones suas cun sos Elio e le Storie Tese. Comente contadu prus bortas dae Faso matessi, custu bassu est istadu comporadu a unu prètziu baratu meda, in cantu si trataiat de unu modellu essidu male: a càusa de un'errore de su machinàriu prepostu a realizare s'allogiamentu pro sos pick-ups, su trastu est istadu istampadu dae un'ala a s'àtera. Faso aiat isseberadu de lu comporare su matessi e de l'acontzare: satisfatu dae su resurtadu, at isseberadu de lu mantènnere, pensende chi sas riparatziones aerent influidu in manera positiva in su sonu.

Pro cugugiare sos sinnos de sas riparatziones, Faso at collocadu in su coddu de su trastu una petzeta de plàstica niedda, cun forma e colore prètzisos a cussas de su vanu in ue b'at s'eletrònica de su bassu. In manera irònica, Faso narat chi cussu siat su vanu de s'eletrònica immaginària dòpia, chi diat fàghere in modu chi su bassu suo siat unu modellu ùnicu in su mundu.

Fintzas si no l'impreat belle mai dae su biu (francu chi in branos comente a "Tristezza"), in carchi branu at sonadu unu bassu fretless. Sa cantzone Cateto, de su primu album, est s'ùnicu casu in ue Faso apat impreadu unu chapman stick, chi però l'est istadu furadu pagu tempus a pustis. Su stick est torradu a pustis a su legìtimu propietàriu cando, prus de deghe annos a pustis, unu ritzetadore l'at propostu a Max Costa, collaboradore istòricu de sos Elio e le Storie Tese. A pustis de cuss'episòdiu, Faso no at impreadu prus cussu trastu, preferende de si dedicare a s'impreu de su bassu traditzionale. In prus issu tenet e at impreadu, mescamente in istùdiu, carchi Fender Jazz Bass e una paia de Manne Newport Special a 4 e 5 cordas. In su Giru "Enlarge Your Penis" impreat unu bassu de liuteria Frudua a 5 cordas, meda simigiante a unu Jazz Bass.

Impreat un'amplificadore Markbass cun càscia 6x10" in editzione ispetziale de colore biancu.

Àteras fainas

• Est connotu fintzas comente speaker radiofònicu de sa trasmissione Cordialmente in direta in Radio Deejay e presentada dae Linus e dae sos Elio e le Storie Tese.
• Est presidente de s'iscuadra de baseball de s'Ares Milanu Baseball, militante in sèrie B, in su girone A, ue giogat cada tantu comente prima base.
• Est cummentadore de sas partidas de baseball de sa MLB (a s'ispissu in paris cun de Elio), in antis pro Tele+, a pustis pro SKY Sport, Fox Sports e como pro DAZN.
• In sos annos 90 at prestadu sa boghe sua pro su pessonàgiu de Beavis in sa sèrie animada Beavis and Butt-Head, dae sa de bator sèries finas a sa de sete, cando Butt-head fiat dopiadu dae Elio.
• In su 2011 at partetzipadu a carchi vìdeu in 3D andadu in direta a pustis in su Nintendo Video in su 3DS a s'incumintzu de su 2012 cun su nùmene de SFAS0 TV.

Curiosidades

• Faso est unu fan de sos Earth, Wind and Fire.
• Fintzas si est mancinu, sonat su bassu comente unu destru.
• In su 2002 at retzidu una tasidura pro doping de 8 meses dae sa faina agonìstica, pro èssere istadu agatadu a pipare un'ispinellu in antis de una partida. In cussu perìodu, durante sos cummentos suos de sas partidas de baseball, trasmìtidas dae Tele+, prus bortas at torradu a nàrrere su disgustu suo pro su mundu de su fùbalu, in ue imbetzes sos giogadores agatados a impreare sustàntzias dopantes meda prus perigulosas e eficatzes de sa cannabis (chi, in manera paradossale, tenet un'efetu rilassante e no etzitante), ant retzidu tasiduras de longària minore, reduidas e in prus iscontadas durante sas pàusas istiales.
• At decraradu prus bortas de no amare ghèneros "estremos" comente a su metal e su punk. At semper odiadu sa versione thrash de Urna, publicada in Italyan, Rum Casusu Çikti e in sas esibitziones dae bivu custa benit semper sonada in sa versione originale, in manera meda prus soft. In prus at prefertu a si fàghere sostituire a su bassu dea Elio pro s'esecutzione de su petzu punk Omosessualità in Eat the Phikis.
• Comente a Elio, tenet orìgines marchigianas, pretzisamente de Macerata.

Bibliografia

• Ermes Palinsesto, Il visone ha una faccia enorme, 2010.

Ligàmenes esternos

• Pàgina dedicada a Faso in su progetu de mùsica internatzionale Party Of The Century Archiviadu su 4 martzu 2016 in s'Internet Archive., in potc.giorgiosound.com.